Órtten zardap shekken pavlodarlyq áieldiń balalary anasyn sońǵy kezderi birge turǵan er adam órtegenin aitty. Politsiia oqiǵany adam óltirýge oqtalý retinde tergep jatyr, - dep habarlaidy Tengrinews.kz agenttigi.
4 qabatty úidegi páterlerdiń birinde 22 qarashaǵa qaraǵan túni órt shyqqan. Oqiǵa ornyna jetken órtsóndirýshiler órtten bes adamdy, onyń ishinde úsh balany alyp shyqty. Órtsóndirýshiler kelgenshe 36 jastaǵy er adam men 27 jastaǵy áiel aýyr halde aýrýhanaǵa jetkizildi. Olar úshinshi dárejeli kúiik alǵan.
Qutqarylǵandar arasynda zardap shekken áieldiń eki oqýshy balasy bar, olardyń bireýin ol ózi órtenip jatqan úiden shyǵaryp úlgergen.
Balalar jergilikti eriktilerge oqiǵanyń mán-jaiyn aityp bergen. Olardyń aitýynsha, páterde órt shyǵarǵan anasy birge turyp jatqan er adam.
"Er adam olardyń anasyn birneshe ret sabaǵan, 22 qarashada úiine bir bótelke benzin ákelip, áielge shashyp, órtep jibergen. Shamasy, ózine de tiip ketken. Ózin órtegisi kelmegen bolar. Biraq ekeýi de otqa oranǵan, balalar úide bolǵan. Anasy ústi jalyndap jatqanyna qaramastan bir balasyn ustap, syrtqa shyǵarǵan. Ekinshi balany sol úide turatyn qurbysy shyǵarǵan", - dedi Instagram jelisinde "Poiskoviki goroda Pavlodara Vita" qoǵamdyq birlestiginiń jetekshisi Ekaterina Kýdriavtseva.
Qazir eki ul da ájesiniń qasynda, anasynyń kelýin kútip júr. Jaqynda ǵana ony reanimatsiiadan palataǵa aýystyrǵan. Oblystyq densaýlyq saqtaý basqarmasy málimetinshe, áieldiń denesiniń 30 paiyzyn kúiik shalǵan. Er adamnyń denesiniń 63 paiyzyn kúiik shalyp, jansaqtaý bóliminde jatyr.
Eriktilerdiń aitýynsha, 24 qarashada olar órtengen páterge barǵan.
Órtke qatysty is adam óltirýge oqtalý retinde tergelip jatyr.
"22 qarashada saǵat 23:02-de Pavlodardaǵy Lomov kóshesi boiynda eki turǵyn zardap shekken oqiǵa boiynsha politsiia 24-baptyń 3-bóligi ("Qylmys jasaýǵa týra baǵyttalǵan, tikelei piǵylmen jasalǵan áreketter (áreketsizdik), eger bul rette qylmys adamǵa bailanysty emes mán-jailar boiynsha aqyryna deiin jetkizilmegen bolsa, qylmysqa oqtalý dep tanylady") boiynsha sotaldy tergeý júrgizip jatyr jáne QK-niń 99-baby 2-bóligi 6-tarmaǵy "Basqa adamdardyń ómirine qaýipti tásilmen jasalǵan kisi óltirý". QR QIJK-niń 201-babyna sáikes sotaldy tergep-tekserý derekteri jariia etilmeidi", - dedi Pavlodar oblysy politsiia departamentiniń baspasóz qyzmeti ókilderi.
