Foto: ashyq derekkóz
Pavlodar soty qonys aýdarýshy hirýrgtyń quqyǵyn qorǵap, kvotaǵa engizýdi mindettedi dep habarlaidy Ult.kz.
Pavlodar oblystyq sotynda ońtústik óńirden qonys aýdarǵan hirýrgtiń shaǵymy qanaǵattandyryldy.
2024 jyldyń qyrkúieginde otbasymen Pavlodarǵa kóship kelgen maman jergilikti emdeý mekemesine hirýrg bolyp jumysqa turǵan. Ol qonys aýdarýshylarǵa arnalǵan óńirlik kvota arqyly materialdyq kómek alýǵa ótinish bergen kezde Mansap ortalyǵynan birneshe ret negizsiz bas tartýǵa tap bolǵan.
Aldymen ortalyq mamandary kvotaǵa qosý úshin Pavlodar qalasynda turǵylyqty jeri boiynsha tirkeýdi talap etken. Alaida 2024 jyldyń jeltoqsanynda «kvota toldy» degen sebeppen qujattary qabyldanbaǵan. 2025 jyldyń basynda ótinishti qaita tapsyrmaq bolǵanda, bul joly kóshi-qon veb-portalynyń tehnikalyq shekteýlerine bailanysty ótinishi ilikpegen: júie Pavlodar oblysynda tirkelgen azamattardyń shaǵymdaryn qabyldamaǵan.
Birneshe márte bas tartýdan keiin azamat sotqa júginýge májbúr boldy.
Sot Mansap ortalyǵynyń áreketterin zańǵa qaishy dep tanydy. Tirkeý týraly talaptyń zańda kózdelmegenin, sondai-aq portaldyń tehnikalyq múmkindikteriniń bolmaýy jeńildikten bas tartýǵa negiz bolmaitynyn atap ótti. Sýdia hirýrgtiń óńirge qonystanyp, áleýmettik mańyzy bar qyzmet atqaryp júrgenin de eskergen.
Nátijesinde Mansap ortalyǵy talap qoiýshyny 2024 jyldyń qazan aiynan bastap óńirlik kvotaǵa engizýge mindetteldi. Sot onyń osy kúnnen bastap materialdyq kómek alýǵa quqyǵyn moiyndady.
Budan bólek, sot ýákiletti organǵa quqyq buzýǵa jol bergen laýazymdy tulǵalardy jaýapqa tartý týraly jeke uiǵarym shyǵaryp, Mansap ortalyǵynyń direktory tártiptik jazaǵa tartyldy.
Sheshim zańdy kúshine endi.
