Búgin Pavlodar oblysynyń ákimi qyzmetinen bosatylǵan Ábilqaiyr Sqaqov Ekibastuz qalasynyń turǵyndarynan keshirim surady, dep habarlaidy QazAqparat.
«Qurmetti jerlester! Men úshin sizderge qyzmet etý asa zor qurmet boldy. Máselelerdi sheshýdi basty basymdyq ete otyryp, barlyǵyn árqashan da shynaiy jáne adal oryndadym. Jyldar boiy jinalǵan máselelerdiń biraz bóligi sheshildi, qalǵandaryn sheshýge ýaqyt kóbirek qajet boldy. Ekibastuzdaǵy tótenshe jaǵdai dál sol – uzaq ýaqyt boiy jinalyp kelgen jáne tez sheshilmeitin problema.⠀
Degenmen, qadirli Ekibastuz turǵyndary, qalyptasqan jaǵdai úshin óz jaýapkershiligimniń de bar ekenin bilemin jáne sizderden shyn júrekten keshirim suraimyn! Osy kúnderi meniń barlyq oiym men ýaiymym sizder týraly boldy jáne solai bolyp qala beredi. Sizderge qairattylyq, al mamandar men áriptesterime máseleniń jedel sheshilýin tileimin», - dep jazdy Sqaqov áleýmettik jelidegi paraqshasynda.
Buǵan deiin habarlaǵanymyzdai, Prezident Qasym-Jomart Toqaev búgin Ábilqaiyr Sqaqovty Pavlodar oblysynyń ákimi qyzmetinen bosatty. Onyń ornyna ýaqytsha Oleg Krýk taǵaiyndaldy.
Eske salaiyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.
Keiinirek jylý qazandyǵynyń isten shyǵýyna bailanysty oblys ákimi bastaǵan jedel shtab quryldy.
Ekibastuz qalasynyń oqýshylary onlain oqýǵa kóshirildi.
28 qarasha kúni tańerteń qalada jergilikti aýqymdaǵy tótenshe jaǵdai jariialandy.
30 qarashada Ekibastuzǵa Premer-Ministr Álihan Smaiylov baryp, kináliler jaýapqa tartylatynyn aitty. Apat sebebi retinde jylý jelileriniń tozýy, jylý ortalyǵy basshylyǵy tarapynan nemquraidylyq pen investitsiialardyń jetkiliksizdigi ataldy.
Búgin tańerteń berilgen málimetke sáikes, 17 kópqabatty turǵyn úi ortalyq jylý jelisine áli qosylǵan joq. Onymen qosa, 58 turǵyn úi sýdan ajyratylǵan.
