Elbasy Pavlodar oblysynyń áleýmettik-ekonomikalyq damý máseleleri jóninde keńes ótkizdi, dep habarlaidy "Ult aqparat".
Jiyndy ashqan Qazaqstan Prezidenti oblys basshylyǵynyń naqty jumys atqaryp jatqanyn jáne óńirde oń ózgeristerdiń baiqalyp otyrǵanyn aitty.
– Men búgin birneshe kásiporynda bolyp, jurtshylyqpen áńgimelestim, halyqtyń jai-kúiimen tanystym. Oblys ekonomikasynyń shamamen 50 paiyzy ónerkásip salasyna tiesili. Bul – Qazaqstan óńirleri arasyndaǵy joǵary kórsetkish, – dedi Nursultan Nazarbaev.
Qazaqstan Prezidenti Pavlodar oblysynyń geografiialyq turǵydan utymdy ornalasqanyn atap ótip, bul óńir Resei Federatsiiasynyń ónerkásibi damyǵan oblystarymen shektesetinine nazar aýdardy.
– Bul oblystyń ónerkásip, energetika, kólik jáne aýyl sharýashylyǵy salalaryndaǵy áleýeti zor, – dedi Elbasy.
Memleket basshysy infraqurylymdy damytý jáne tiisti nysandardy salý máselelerine erekshe toqtaldy.
– Astana men Pavlodardy birinshi sanatty avtoban jalǵap jatyr. Endi, jol júrý ýaqyty bes-alty saǵat emes, úsh saǵatqa sozylady. Oblystyń tranzittik áleýeti keńeiip keledi, – dedi Nursultan Nazarbaev.
Qazaqstan Prezidenti óńirdiń kásipkerlerine arnalǵan sózinde shikizatty qaita óńdeýdi meilinshe jaqsartý jáne básekege qabiletti ónim shyǵarý máselelerine nazar aýdardy.
– Men búgin aliýminii óndiretin, toq ótkizgish kabel jasaityn kompaniialardyń jáne basqa da kásiporyndardyń jumysymen tanystym. Biz qurylys materialdaryn shyǵarý, tereze jaqtaýlaryn, ydys-aiaq jáne aliýminiiden folga jasaý múmkindigin qarastyrýymyz qajet. Mine, osy iske investitsiia tartyp, kúsh jumyldyrý kerek, – dedi Elbasy.
Keńes barysynda Pavlodar oblysynyń ákimi Bolat Baqaýov Memleket basshysyna óńirdiń áleýmettik-ekonomikalyq damýy, «Rýhani jańǵyrý» memlekettik baǵdarlamasy jáne «Prezidenttiń bes áleýmettik bastamasy» aiasynda iske asyrylyp jatqan jobalar jóninde málimdedi.
– 2017 jyldyń qorytyndysy boiynsha oblystyń jalpy ónimi alǵash ret 2 trillion teńgeden asyp, 3,6 paiyzǵa jetti. Biylǵy birinshi jarty jyldyqtyń qorytyndysy boiynsha óndiris kólemi 4,6 paiyzǵa artty. Oblys kásiporyndaryndaǵy óndiris úderisterin tsifrlandyrý jónindegi Sizdiń tapsyrmańyz oryndalýda. Tehnologiialyq turǵydan qaita jabdyqtaý isine 200 milliard teńgeden astam qarjy jumsaldy, – dedi oblys ákimi.
Memleket basshysy jiyn qorytyndysy boiynsha óndiriske halyqaralyq «EKSPO-2017» mamandandyrylǵan kórmesinde kórsetilgen «jasyl» tehnologiialardy engizý, shaǵyn jáne orta biznesti, Resei oblystarymen shekaraaralyq saýda-sattyqty damytý, óńirdegi týristik klasterdiń áleýetin arttyrý, mal sharýashylyǵy men sýarmaly eginshilikti órkendetý úshin naqty tapsyrmalar berdi.
Keńeske Prezident Ákimshiliginiń Basshysy Á.Jaqsybekov, Premer-Ministrdiń birinshi orynbasary A.Mamin, Energetika ministri Q.Bozymbaev, memlekettik organdardyń ókilderi, iri ónerkásip kásiporyndarynyń jetekshileri, sonyń ishinde ERG direktorlar keńesiniń tóraǵasy A.Mashkevich, «Prommashkomplekt» JShS-i direktorlar keńesiniń tóraǵasy D.Syzdyqov, «Stalmontaj» JShS-niń bas direktory A.Terentev, «Kazenergokabel» AQ-nyń bas direktory O.Krýk jáne basqa da azamattar qatysty.
Sonymen qatar, Memleket basshysy Sultanmahmut Toraiǵyrov atyndaǵy Pavlodar oblystyq birikken ámbebap ǵylymi kitaphananyń jumysymen de tanysty. Onda múmkindigi shekteýli oqyrmandarǵa arnalǵan arnaiy jabdyqtar, bilim berý jáne densaýlyq saqtaý salalaryn tsifrlandyrý jobalary, sondai-aq «Rýhani jańǵyrý» jobalyq ofisiniń kórme zaly kórsetildi.
.jpeg)