Foto: Inbusiness.com
Pavlodar oblysynyń ákimi Asaiyn Baihan mas kúiinde rólge otyryp ustalǵan týǵan ápkesine qatysty pikir bildirdi. Onyń sózinshe, otbasy músheleriniń eshqaisysy zań aldyndaǵy jaýapkershilikten tys emes. Bul týraly Ult.kz habarlaidy.
«Meniń úlken ápkemniń ákimshilik jaýapkershilikke tartylýyna qatysty mynany aita alamyn: barlyq azamattar zań aldynda teń. Meniń ápkem de, otbasymyzdyń basqa músheleri siiaqty, bul qaǵidattan tys emes», – dep jazdy oblys ákimi Threads áleýmettik jelisinde.
Oqiǵa bir ai buryn Ekibastuzda bolǵan. Politsiia Hyundai Tucson kóligin toqtatqan kezde róldegi áielden alkogol iisi sezilip, ol narkodispanserge jetkiziledi. Saraptama onyń jeńil dárejede mas bolǵanyn anyqtady. Qyzmettik hattama Ákimshilik kodekstiń 608-baby boiynsha toltyrylǵan.
Sotta áiel ózin aqtap, kólikti júrgizbegenin, tek syrtta tońyp, jylynyp alý úshin rólge otyrǵanyn aityp aqtaldy. Azdap ishkenin moiyndady. Kýáger retinde kelgen Kýlikov esimdi er adam da kólik qozǵalmaǵanyn aityp, áieldi qoldamaq boldy.
Alaida patrýl qyzmetkerleri olardyń ýájin joqqa shyǵardy. Politseiler kólikti júrip kele jatqan kezde toqtatqanyn, ishinde tek áiel bolǵanyn jáne alkogol iisin anyq sezgenin aitty.
Sot politseilerdiń sózine senip, hattamanyń zańdy rásimdelgenin rastady. Sýdia Elýbai Serikpaev áieldi 7 jylǵa júrgizýshi kýáliginen aiyryp, 15 táýlikke qamaý túrindegi jaza taǵaiyndady.
