Pavlodar oblysynyń ákimi Bolat Baqaýov óńirdegi bilim kórsetkishteri týraly aityp berdi, dep habarlaidy "Ult aqparat".
«Bilim salasynda kópbalaly jáne jaǵdaiy nashar otbasy balalaryna qoldaý kórsetiledi. Olarǵa tegin jol júrý bileti beriledi, balabaqshaǵa tegin qabyldanady. Óńirde 3 jasqa deiingi balalardy mektepke deiingi bilimmen 100% qamtamasyz ettik. Bul kórsetkish birneshe jyldan beri saqtalyp keledi», - dedi ákim Ortalyq kommýnikatsiialar qyzmetinde 2019 jyldyń 10 aiyndaǵy óńirdiń áleýmettik-ekonomikalyq damýy týraly baspasóz máslihatynda.
Onyń aitýynsha, óńirdegi 1 jastan asqan balalardy qamtý kórsetkishi 80,1% quraidy. Respýblika boiynsha ortasha kórsetkish 77,1% qurasa, bul óte jaqsy nátije.
«Oblysta úsh aýysymdy nemese apattyq jaǵdaidaǵy mektep atymen joq. Bilim berý sapasyn jaqsartý úshin oqytý uiymdarynyń jelisi keńeiýde. Ekibastuz qalasyndaǵy Solnechnyi aýylynda 420 oryndyq mektep qurylysy aiaqtaldy. Pavlodar qalasynda taǵy 2 mektep qurylysy bastaldy. Biyl kópbalaly jáne az qamtylǵan otbasy balalaryn ystyq tamaqpen qamtamasyz ettik. Al qańtar aiynan bastap, 1-4 synyp aralyǵyndaǵy barlyq oqýshylar tegin ystyq tamaq ishetin bolady. Bul - shamamen bastaýysh synyptaǵy 51 myń bala», - dedi ákim.
Sonymen birge, B. Baqaýov stýdentterdi jataqhanamen qamtý sharalary jóninde aityp berdi.
«Pavlodar pedagogikalyq ýniversiteti bazasynda memlekettik-jekeshelik áriptestik arqyly 167 adamǵa arnalǵan jataqhana salyndy. Taǵy 2 jataqhana Pavlodar men Aqsý stýdentteri úshin jyl sońyna deiin paidalanýǵa beriledi. Olardyń árqaisysynda 200 oryn bar. Kelesi jyly S. Toraiǵyrov atyndaǵy Pavlodar memlekettik ýniversiteti men Pavlodar pedagogikalyq ýniversiteti janynan 500 oryndyq jataqhana ashylady», - dep óz sózin túiindedi Bolat Baqaýov.
