Pavlodar oblysynda qus tumaýynan joiylǵan qustary úshin turǵyndarǵa 83,2 mln teńge tólenedi, dep habarlaidy "Ult aqparat" Pavlodarnews.kz-ke silteme jasap.
Bul týraly óńirlik kommýnikatsiialar qyzmetinde ótken baspasóz máslihatynda QR AShM Veterinarlyq baqylaý jáne qadaǵalaý komitetiniń Pavlodar oblystyq aýmaqtyq inspektsiiasynyń basshysy Rashid Nurbekov málim etti.
- Oblysymyzda 5 aýdannyń 7 aýylynda joǵary patogendi qus tumaýy anyqtaldy. Karantindik sharalar júrgizilýde. 126 367 qus ielerinen alynyp, joiyldy. 3163 bas qus óldi. Óńirimizge 503 myń doza vaktsina jetkizildi. 400 myń bastan astam qus egildi. Búginde epizootiialyq jaǵdai turaqty, - dedi Rashid Nurbekov.
Pavlodar oblysynda qus tumaýy Aqtoǵai jáne Baianaýyl aýylynda, Tereńkól aýdanynda Jańaqurylys aýyly, Ertis aýdanynda – Aǵashoryn, Jelezin aýdanynda Aqtaý, Jańajuldyz, Ozernoe aýyldarynda tirkeldi.
Rashid Nurbekovtyń aitýynsha, statistika komitetiniń resmi saitynda qustardyń baǵasy bekitilgen. Qaz – 6500 tg, úirek – 3516 tg, taýyq – 1187,5 tg, kúrketaýyq – 5000 tg bolyp baǵalanǵan.
- Qazirgi ýaqytta tólem jasaý úshin qujat jinaý júrgizilýde. Tolyq qujat Ertis, Tereńkól, Jelezin aýdandarynda daiyn. Turǵyndar joiylǵan qustary tirkelgen sharýashylyq kitapshasynyń kóshirmesin, derbes shottaryn tapsyrýy tiis. Qujattar elordadaǵy bas keńsege jetkennen keiin 2-3 kún ishinde qarjy jiberiledi. Bizdiń oblys osy aptada tólemderdi ala bastaidy dep oilaimyn. Esep boiynsha oblysymyzda joiylǵan qustar úshin 83,2 million teńge tólenedi, - dedi Rashid Nurbekov.
Pavlodar oblysy aýyl sharýashylyǵynyń basqarmasy basshysynyń orynbasary Marat Apsalyqovtyń sózine qaraǵanda, óńirde sońǵy qus ólimi 28 qyrkúiek kúni tirkelgen. Vatsinalardy egý aldymen shekaradaǵy aýdandardan bastaldy, búginde sońǵy eki aýdan qalǵan.
