QR Indýstriia jáne infraqurylymdyq damý ministri Beibit Atamqulov Úndistannyń «Monnet» kompaniialar tobynyń negizin qalaýshy jáne Basqarma tóraǵasy Sandip Djadjodiiamen kezdesti, dep habarlaidy "Ult aqparat".
Atalǵan ministrlik málimetinshe, Úndistan kompaniiasy Pavlodar oblysynda ferrosilitsiia shyǵaratyn metallýrgiialyq zaýyt salýdy josparlap otyr. Zaýyttyń óndiristik qýaty alǵashynda jylyna 15 myń tonna bolsa, keiin 50 myń tonnaǵa deiin arttyrý kózdelgen. Investitsiianyń aldyn ala kólemi basynda 50 mln dollardy qurasa, ekinshi kezeńde 200 mln dollarǵa deiin jetkiziledi. Zaýyttyń negizgi ónimi eksportqa shyǵarylmaq. Atalǵan kompaniianyń investitsiialyq operatory – QR Syrtqy ister ministrliginiń «Qazaqinvest» AQ.
«Sondai-aq, Pavlodar oblysynyń Ekibastuz indýstriialyq aimaǵy aýmaǵynda ónerkásipti energetikalyq qoldaý máseleleri, sonymen qatar shikizatty jetkizýshilerdiń múmkindikteri talqylandy», - delingen vedomstvonyń Telegram kanalynda jariialanǵan aqparatta.
