Pavlodar oblysynda ákimshilik raqymshylyq aiasynda boryshkerlerdiń 200 million teńgeden astam ákimshilik aiyppuly keshirildi, dep habarlaidy ult.kz.
Polisia.kz málimetinshe, Qazaqstan tarihynda alǵash ret júzege asyrylǵan ákimshilik raqymshylyq zańda kózdelgen jekelegen baptar boiynsha azamattardy ákimshilik aiyppuldardy tóleýden bosatýdy qarastyrady.
Pavlodar oblysynda bul shara 19 061 ákimshilik iske qatysty qoldanyldy. Sonyń nátijesinde jalpy somasy 200 million teńgeden asatyn aiyppuldar boiynsha atqarýshylyq óndirister toqtatyldy.
Máselen, Pavlodar qalasynyń 27 jastaǵy turǵyny otbasylyq jaǵdaiyna bailanysty birneshe ákimshilik aiyppulyn uzaq ýaqyt tólei almaǵanyn aitady.
«Men úshin bul raqymshylyq – jańa múmkindik. Otbasylyq jaǵdaiyma bailanysty aiyppuldardy ýaqytynda tólei almadym, bul maǵan úlken qarjylyq salmaq boldy. Endi zań buzbaimyn jáne barlyq júrgizýshini jol qozǵalysy erejelerin saqtaýǵa shaqyramyn», – deidi pavlodarlyq Igor.
Politsiia ákimshilik raqymshylyqtyń bir rettik izgilik sharasy ekenin eskertedi. Bul azamattardy aldaǵy ýaqytta jasalatyn quqyq buzýshylyqtar úshin jaýapkershilikten bosatpaidy. Zań buzýshylyq qaitalanǵan jaǵdaida kináli tulǵalar qoldanystaǵy zańnamaǵa sáikes tolyq kólemde jaýapqa tartylady.
«Zań men tártip qaǵidatyn saqtaý – qaýipsiz ári ádiletti qoǵamnyń negizi», – dedi Pavlodar oblysy PD ákimshilik politsiia basqarmasynyń bastyǵy Bakibai Ahmedianov.
