Aqtóbede esepshi kompaniianyń aqshasyn týystarynyń esepshotyna aýdaryp, keiin ony qolma-qol aqshaǵa ainaldyryp, ózine jumsaǵan. Ol tipti páter de satyp alǵan, - dep habarlaidy Tengrinews.kz agenttigi "Massaget" saityna silteme jasap.
Sot ony 7 jylǵa bas bostandyǵynan aiyryp, páteri men tońazytqyshyn tárkilegen.
Basylym málimetinshe, 2015 jyly Alǵa qalasynyń turǵyny Svetlana N. "Alǵa tazalyq" kommýnaldy kásipornynda bas esepshi bolyp jumys istegen. Al 2016 jyly kompaniianyń aqshasyn jymqyrǵany úshin eki ret sottalǵan. Úkimderdiń birinde ol "Alǵa tazalyq" mekemesinde jumys istemeitin eki turǵynǵa zeinetaqy men áleýmettik tólem aýdarǵany aitylǵan. Eki qylmystyq is boiynsha ol shartty túrde bas bostandyǵynan aiyrylǵan.
Osylaisha, qarjylyq qylmysy úshin eki ret sottalǵan ol 2018 jyly "Neohim" JShS mekemesine bas esepshi bolyp qaita jumysqa ornalasqan. Ol júktiligine bailanysty demalysqa shyqqan soń seriktestik tekseris júrgizip, nátijesinde 64 millionnan asa qarajat jetpeitini anyqtalǵan. Al sodan keiin tergeý barysynda bas esepshi seriktestik shotynan týystarynyń, onyń ishinde anasy men ápkesiniń esepshotyna aqsha aýdarǵany belgili bolǵan. Basylym málimetinshe, esepshi jymqyrǵan aqshasyna Alǵadan páter satyp alǵan, ony kúieýiniń anasyna aýdarǵan.
Bas esepshiniń alaiaqtyǵy áshkere bolǵan kezde ol senip tapsyrylǵan múlikti zańsyz iemdendi degen aiyppen sot aldyna qaita kelgen. Aiyptalýshy keltirilgen shyǵyn mólsherimen kelispei, ony túrmege jibermeýdi suraǵan. Ol tórt bala tárbielep otyr. "Kópbalaly ana" mártebesi ony qamaý merzimnen qutqara almaǵan. Al seriktestikke 64 million teńge kóleminde aqsha óteýi tiis. Ol sot úkimi jariialanǵannan keiin birden qamaýǵa alynǵan.
