QR Parlamenti Májilisi Qarjy jáne biýdjet komitetiniń múshesi Amanjan Jamalov zeinetaqymen qamsyzdandyrý týraly zańnyń normalaryn túsindirýlerge qatysty problemany túzetýlerdiń úkimet qaýlysyna der kezinde engizilmegenimen bailanystyrdy, - dep habarlaidy Tengrinews.kz tilshisi.
"Birden jaýapty túrde málimdegim keledi, qazirgi quqyqtyq normativtik aktiler azamattardy páter satýdan jáne depozitter boiynsha syiaqy paiyzdarynan túsken qarjydan zeinetaqy jarnasyn tóleýge mindetteýdi qarastyrmaidy", - dedi depýtat.
Onyń aitýynsha, "Qazaqstan Respýblikasynyń zeinetaqymen qamsyzdandyrý týraly zańdaryna" sońǵy túzetýler 2018 jyly 2 shildede engizilgen. Ol túzetýler "azamattyq-quqyqtyq sipattaǵy shart boiynsha tabys tabatyn jeke tulǵalarǵa" zeinetaqy jarnasyn tóleý mindetin bekitti.
"Buryn ol óz erkinde bolatyn. Sonymen qatar, zań deńgeiinde, ol jaldamaly jumysshylardyń jáne jeke kásipkerlerdiń jaǵdaiyndaǵydai boldy, jarna tólenetin kiristerdiń túrleri naqtylanbaǵan. Bul úkimettiń qaýlysymen retteledi - Zeinetaqy jarnasyn esepteý erejelerimen. Bul qaýlyda kimniń jáne qandai kiristen zeinetaqy jarnasynyń tólenetini tolyq kórsetilgen. Zań jobasy Parlamentte talqylanǵanda áńgime tek jumys pen qyzmetten túsken kiris týraly boldy. Zań normalaryn túsindirýde qazir paida bolǵan problema kórsetilgen qaýlyǵa túzetýlerdiń der kezinde engizilmegenimen bailanysty", - dedi Amanjan Jamalov.
Sondyqtan, onyń aitýynsha, azamattyq-quqyqtyq sipattaǵy shart boiynsha tabys taýyp otyrǵan jeke tulǵalar úshin mindetti zeinetaqy jarnasyn esepteý men tóleý tártibi boiynsha zańǵa qosymsha quqyqtyq normativtik aktiler deńgeiinde bul quqyqtyq olqylyq saqtalady.
"Bul tujyrymdy Eńbek jáne halyqty áleýmettik qorǵaý ministrligindegiler rastady. Biraq qazirgi redaktsiianyń ózimen páter men kólikti satýdan túsken aqshadan eshqandai zeinetaqy jarnasyn tóleýdiń qajet joq. Qaýlyda neniń zeinetaqy jarnalaryn esepteýdiń nysany bola almaitynyn tikelei kórsetetin norma bar - ol tizim kiris salyǵynan bosatylǵan kiristermen sáikes keledi. Ol tizimge múlikti satýdaǵy jáne depozitter boiynsha paiyzdardyń qun ósiminen túsken tabystar kiredi. Jaqynda úkimet qaýlysyna túzetýler engizilip, bul máseleniń barlyǵy sheshiledi dep senemin", - dedi depýtat.
Eske sala keteiik, buǵan deiin zeinetaqymen qamsyzdandyrý zańyna engizilgen jańa ózgeristerdiń qazaqstandyqtardy páter nemese kólik syndy jeke múlikti satýdan túsken kirisiniń 10 paiyzyn BZJQ-ǵa berýge mindettegeni týraly aqparat taraǵan bolatyn. Keiin bul ózgeristerdi eńbek jáne halyqty áleýmettik qorǵaý vitse-ministri túsindirip berdi.
