Armeniia premer-ministri Nikol Pashinian Taýly Qarabaqtaǵy jaǵdaidyń órbýine jaýapty ekenin moiyndady. 10 qarashadaǵy Baký, Erevan jáne Máskeý arasyndaǵy kelisimge sai, Ázerbaijan Taýly Qarabaqtaǵy Stepanakertten basqa barlyq aimaqty, Mardakert jáne Martýni qalalaryn da alady. Osyǵan deiin bul kelisimge qarsylyq tanytqan Armeniia turǵyndary Pashiniannyń otstavkaǵa ketýin talap etken bolatyn.
"Men halyq aldynda, sot aldynda jaýap beremin, biraq mundai jaǵdaida adamdar sabaq ala bilýi tiis... Sarbazdardy, oppozitsiia, úkimetti tyńdaý kerek bolady" dedi Pashinian. Onyń sózinen úzindini "Armenpress" agenttigi keltirdi.
Pashiniannyń sózine qaraǵanda, armian biligine "Ázerbaijanǵa shart qoimai aýmaqty qaitarý týraly halyqaralyq konsensýs bar kezde" áreket etýine týra kelgen.
Onyń aitýynsha, úkimet máseleni eki qyrynan: máseleni áskeri jolmen sheshýge bolmaidy jáne "bir qarys ta jer bermeý" printsipteri boiynsha qarastyrǵan. "Ýaqytty sheksiz soza berýge bolady" dep oilap, eń iri qatelikke urynǵanyn da jetkizgen.
10 qarashaǵa qaraǵan túni Armeniia premer-ministri Nikol Pashinian, Resei prezidenti Vladimir Pýtin jáne Ázerbaijan basshysy Ilham Áliev Taýly Qarabaqta atysty toqtatý týraly ortaq málimdemege qol qoiǵan. Taraptar Baký Taýly Qarabaqtyń bir bóligin alady - halyqaralyq dárejede moiyndalmaǵan Taýly Qarabaq respýblikasy úshin strategiialyq mańyzdy Shýsha qalasy, Agdam, Kelbadjar, Lachin aýdandary da ázerbaijan jaǵyna ótedi dep ýaǵdalasqan. Kelisim boiynsha, reseilik bitimger sarbazdar da aýmaqqa kiredi.
11 qarashada Resei jáne Túrkiia qorǵanys ministrleri Ázerbaijan aýmaǵynda bitimgerlik missiiaǵa arnalǵan ortaq baqylaý ortalyǵyn qurý týraly memorandýmǵa qol qoidy. Bul ortalyq kelisimniń oryndalý sharttaryn qadaǵalap, uzaq jylǵa sozylyp kele jatqan qaqtyǵysty retteý negizin qalyptastyrýǵa kómektesýi tiis.
