Ýkrainanyń shyǵysyndaǵy ózin-ózi "táýelsiz respýblika" dep jariialaǵan Lýgansk oblysynyń basshysy Leonid Pasechnik Resei qoldaityn separatister baqylaýyndaǵy aýmaqta Reseige qosylý týraly referendým ótetinin málimdedi.
"Meniń oiymsha, jaqyn kúnderi respýblika aýmaǵynda referendým ótip, halyq óziniń konstitýtsiialyq quqyǵyn tolyq paidalanady. Sondai-aq, Reseige qosylý jónindegi oi-pikirin bólisedi. Osylai bolaryna kámil senem",- deidi Pasechnik.
21 aqpanda Resei prezidenti Vladimir Pýtin 2014 jyly separatister qurǵan "Lýgansk jáne Donetsk respýblikalarynyń" táýelsizdigin moiyndaǵan. 24 aqpanda "halyq respýblikalaryn qorǵaý" degen jeleýmen Ýkrainaǵa basyp kirgen.
Lýgansk oblysynyń kóp bóligi qazir separatister baqylaýynda tur, Rýbejnoe - Severodonetsk - Lisichansk aglomeratsiiasy úshin shaiqas bolyp jatyr. Separatister Donetsk oblysynyń jartysynan sál asatyn bóligin baqylap otyr, referendým týraly ázirge sóz qozǵalmaǵanyna ol da bir sebep bolýy múmkin.
2014 jyly Ýkrainanyń Resei anneksiialap alǵan Qyrym avtonomiialy respýblikasy men Sevastopol qalasynda Reseige qosylý jóninde referendým ótken. Sóitip bul aimaqty Resei qosyp alǵan edi. Álemniń kóptegen eli Reseidiń Qyrymdy anneksiialaǵanyn quptaǵan joq, ondaǵy referendým da "Resei áskeriniń yqpalymen ótti" dep eseptedi.
