Senat depýtaty Dana Nurjigit halyqqa zańdy qarapaiym tilde túsindirý jáne taratý máselesin kúsheitý qajet ekenin aitty, dep habarlaidy Sputnik Qazaqstan.
Senattyń jalpy otyrysynda normashyǵarmashylyqty jetildirý máseleleri týraly zań jobasy qaraldy.
Suraq-jaýap barysynda senator Dana Nurjigit elde qabyldanǵan zańdar qarapaiym halyqqa túsindirilmeitinin jáne jetkizilmeitinin aitty.
"Óńirlerge issapar barysynda baiqaǵanym – halyq qabyldanyp jatqan zańdardan kóp jaǵdaida beihabar. Iaǵni, parlamentte qabyldanǵan zań óńirlerge, halyqqa jetkizilmeidi. Kezdesýde azamattardyń kóbisiniń suraǵy alyp-qashpa áńgimelerge negizdelgen. Sol sebepti halyqqa zańdy ashyq, qarapaiym tilde túsindire alý jáne ony barynsha taratý máselesin kúsheitý qajet", - dep sanaidy depýtat.
Aitýynsha, osynyń saldarynan áleýmettik jeldegi blogerler, táýelsiz sarapshylar, zańdy óz paiym-túsinigi sheńberinde taldap, talqylap jatady. Al tiisti memlekettik organnnyń túsindirmesi keshigip baryp, qoǵam qyzý talqylaǵannan keiin ǵana resmi túrde taratyla bastaidy. Iaǵni halyq pen bilik arasyndaǵy media kommýnikatsiiasy problemasy bar, dep jalǵastyrdy ol.
Dana Nurjigit ádilet ministrinen osy másele qalai sheshiletinin surady.
Marat Beketaevtyń aitýynsha, endi árbir zań jobasy men qabyldanǵan zań aqparattyq túsindirý baǵdarlamasymen súiemeldenedi.
"Zańdy túsindirý jáne aqparattyq súiemeldeý baǵdarlamasynyń oryndalýyn ádilet ministrligi men aqparat jáne qoǵamdyq damý ministrligi qadaǵlaidy. Mundai baǵdarlama zań jobasynyń normalaryn azamattarǵa túsindirýge baǵyttalǵan is-sharalardy kózdeidi. Bul sharalar jańa quqyqtar men mindetterdi halyqqa túsinikti tilde jetkizýdi qamtamasyz etedi", - dedi ministr.
Máselen, aitýynsha, zań jobasy ázirlengen kezde ázirleýshi organdar ashyq qoǵamdyq talqylaý ótkizedi, BAQ-qa brifing beredi. Al zań qabyldanǵan soń, ázirleýshi organdar praktikalyq nusqaýlar berip, arnaiy beinerolikter jasaidy jáne internetke ornalastyrady, basqa da tásilderdi qoldanýy múmkin.
Senat spikeri Máýlen Áshimbaev zańdardy halyqqa jetkizý problemasy óte ózekti ekenin aityp, kúzge qarai osy másele boiynsha arnaiy úkimet saǵatyn uiymdastyrýdy usyndy.
18 aqpanda senat "Qazaqstan Respýblikasynyń keibir zańnamalyq aktilerine normashyǵarmashylyqty jetildirý máseleleri boiynsha ózgerister men tolyqtyrýlar engizý týraly" zań jobasyn eki oqylymda qarap, qabyldady.
Jańa zańda azamattar men bizneske qosymsha mindetter júkteitin normalarǵa qatysty "ótpeli kezeń" tájiribesi zańnamalyq deńgeide belgilendi.
Jańa mindetterdi belgileitin normalar halyq pen biznestiń daiyn bolýyna qarai, qabyldanǵan kúninen bastap alpys kúndik merzimnen erte engizilmeidi.
Ekinshi – zań jobalaryn qoǵamdyq talqylaý tásilderi keńeitiledi.
Azamattardy jańa normalarǵa aldyn ala daiyndaý maqsatynda árbir zań jobasy men qabyldanǵan zań aqparattyq túsindirý baǵdarlamasymen súiemeldenedi.
Úshinshi – qabyldanǵan zańdardyń tiimdiligi baǵalanady. Bul mindet zańdy ázirlegen memlekettik organdarǵa júkteledi.
Qabyldanǵan zańnyń tiimdiligin baǵalaý úshin ázirleýshi organ jańa retteýdiń salystyrmaly nátijeleri kórsetilgen esep daiyndaidy. Bul esep quqyqtyq monitoring aiasynda qoldanylady, sondai-aq, parlamenttik tyńdaýda nemese úkimet saǵatynda talqylanýy múmkin.
