Prezident halyq qaýipsizdigi men memleket múddesi bárinen biik ekendigin óz isimen dáleldedi. Bul týraly Májilis tóraǵasy Erlan Qoshanov málim etti, dep habarlaidy QazAqparat.
«Memleket basshysy Qasym-Jomart Kemeluly Toqaev aitqan «Jańa Qazaqstan» qurý jolynda Parlamentke artylar júk te, júkteler jaýapkershilik te óte zor. Sondyqtan osynaý syndarly kezeńde halyq seniminen shyǵyp, Prezident bastamalaryn barynsha qoldaý – bizdiń basty mindet. Sailaýshylar tarapynan depýtattarǵa qoiylatyn talap qashan da joǵary ekendigin ózderińiz bilesizder. Ásirese, keshegi qańtar oqiǵalary – búkil elimiz úshin úlken syn boldy. Kún tártibinde táýelsizdigimiz men memleketimizdiń tutastyǵyn saqtap qalý máselesi turdy. Eldigimizge qaýip tóngen osy syn saǵatta Memleket basshysy barlyq jaýapkershilikti ózine alyp, batyl sheshimder qabyldady. Prezident halyq qaýipsizdigi men memleket múddesi bárinen biik ekendigin óz isimen dáleldedi», - dedi Qoshanov Májilistiń jalpy otyrysynda.
Osy oraida Májilis tóraǵasy birinshi kezekte, Parlament jumysynyń ashyqtyǵyn qamtamasyz etý qajet ekenin atap ótti. Halyq sailaǵan depýtattar – eń aldymen, óz sailaýshylaryna jaqyn bolý kerek.
«Qoǵamnyń únin estip, halyqtyń tilin túsiný jáne der kezinde sharalar qabyldaý – kez kelgen keleńsizdiktiń aldyn alýdyń negizgi alǵysharty ekeni túsinikti. Sondyqtan aldaǵy ýaqytta, depýtattar korpýsynyń azamattyq sektormen, buqaralyq aqparat quraldary ókilderimen, ásirese, óńirlerdegi qoǵam belsendilerimen tyǵyz bailanysyn odan ary jandandyratyn bolamyz. Bul – Prezident bekitken «Halyq únine qulaq asatyn memleket» qaǵidasyn nátijeli júzege asyrýdyń da basty ustanymy. Aldymyzǵa qoiylǵan jańa mindetterdi tabysty oryndaý úshin azamattyq qoǵammen qatar, memlekettik organdardyń barlyq tarmaqtarymen, sonyń ishinde, Senatpen, Úkimetpen, Sot salasymen ózara tyǵyz yntymaqtastyqta jumys isteimiz», - dedi ol.
