Parlament azamattar zeinetaqy jinaǵyndaǵy qarjynyń bir bóligin alǵan kezde bir rettik tabys salyǵyn birden tólemeýge múmkindik beretin qujatty qabyldady, dep habarlaidy "Ult aqparat".
Búgin Parlament Májilisiniń jalpy otyrysynda palata depýtattary «Salyq jáne biýdjetke tólenetin basqa da mindetti tólemder týraly» Kodekske jáne «Salyq jáne biýdjetke tólenetin basqa da mindetti tólemder týraly» Kodeksin qoldanysqa engizý týraly» Zańǵa ózgerister men tolyqtyrýlar engizý týraly» zań jobasyna Senat engizgen tolyqtyrýlarmen kelisti.
QR Parlamentiniń Senaty 46 túzetý engizdi. Bul rette túzetýler Memleket basshysynyń 2020 jylǵy 1 qyrkúiektegi «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýynda aitylǵan negizgi sharalardy iske asyrýǵa bailanysty.
Onda:
- Qazaqstan Respýblikasynyń zeinetaqymen qamsyzdandyrý týraly zańnamasyna sáikes birjolǵy zeinetaqy tólemderin paidalanǵan kezde jeke tulǵalarǵa jeke tabys salyǵyn tóleý merzimin keiinge qaldyrý quqyǵyn berý, sondai-aq ony esepteý, ustap qalý jáne tóleý tártibin aiqyndaý;
- pandemiiadan neǵurlym kóp zardap shekken sektorlarda jumys isteitin shaǵyn jáne orta biznes sýbektilerine ainalymnan bólshek saýda salyǵyn tóleý quqyǵyn berý maqsatynda bólshek saýda salyǵynyń arnaiy salyq rejimin engizý;
- Úkimet aiqyndap qoiǵan qyzmet túrleriniń tizbesi boiynsha ekonomikanyń neǵurlym kóp zardap shekken salalaryndaǵy mikro, shaǵyn jáne orta biznes sýbektilerine biýdjetke tólenýi tiis áleýmettik salyq somasyn eseptelgen áleýmettik salyq pen áleýmettik aýdarymdar somasy arasyndaǵy aiyrma retinde aiqyndaý quqyǵyn aǵymdaǵy jyldyń sońyna deiin berý.
«Senat engizgen túzetiler Májilis maquldaǵan zań jobasynyń tujyrymdamasyn ózgertpeidi jáne mazmunyn nasharlatpaidy.
Osy aitylǵandardy eskere otyryp, Qarjy jáne biýdjet komiteti «Salyq jáne biýdjetke tólenetin basqa da mindetti tólemder týraly» Kodeksine jáne «Salyq jáne biýdjetke tólenetin basqa da mindetti tólemder týraly» Kodeksin qoldanysqa engizý týraly» QR Zańyna ózgerister men tolyqtyrýlar engizý týraly» zań jobasyna Senat engizgen ózgeristermen jáne tolyqtyrýlarmen kelisýdi usynady», - dedi Májilis depýtaty Sergei Simonov.
Eske sala keteiik, buǵan deiin Memleket basshysy Qasym-Jomart Toqaev 2021 jyldan bastap azamattarǵa zeinetaqy jinaǵynyń bir bóligin paidalanýǵa múmkindik berý jóninde tiisti memlekettik organdarǵa tapsyrma bergen edi. Alaida bul qarajat úshin tabys salyǵyn tóleý qajet. Dál osy másele qoǵamda narazylyq týdyrdy. Sondyqtan senatorlar bul tólemdi keiinge shegerýdi jáne birneshe jylǵa bólip tóleýdi usyndy. Iaǵni, zeinetaqy jinaǵyndaǵy qarjyny kelesi jyldan bastap alýǵa bolady.
«Zeinetaqy jinaǵyndaǵy qarjynyń bir bóligin aldyn ala alǵan kezde onyń 10 paiyzyn bir rettik salyq retinde tóleý kerek. Ony qazirgidei kúrdeli kezeńde azamattar úshin tiimsiz dep esepteimiz. Sondyqtan atalǵan salyqty zeinetaqy jinaǵyn alǵan kezde emes, tek zeinetke shyqqan soń ǵana tóleý usynylyp otyr. Onyń ózinde, bárin birden aýdarmai, zań jobasyna 16 jyldyń ishinde bólip tóleý týraly norma engizildi», – dedi Senat tóraǵasy Máýlen Áshimbaev.
