Foto: parlam.kz
Búgin Májilistiń jalpy otyrysynda palata depýtattary «Qazaqstan Respýblikasynyń keibir zańnamalyq aktilerine QR Ulttyq qorynan balalarǵa arnalǵan qarajatty esepteý, tóleý jáne paidalaný máseleleri boiynsha ózgerister men tolyqtyrýlar engizý týraly» Zańynyń Senat jańa redaktsiiada usynǵan jekelegen baptarymen kelisti, dep habarlaidy Kazinform.
«Zań jobasy 2023 jylǵy 23 mamyrda Parlament Májilisine engizildi. Qujattyń negizgi maqsaty - kámeletke tolǵan kezde jinalǵan qarajat esebinen turǵyn úi jaǵdailaryn jaqsartýǵa nemese bilim alýǵa múmkindik jasaý maqsatynda Qazaqstan Respýblikasy azamattarynyń óskeleń urpaǵyn qoldaý. 2023 jylǵy 20 qyrkúiekte Májilis qabyldaǵan zań Parlament Senatynyń qaraýyna jiberildi. Senat 13 qazanda zańdy qaitardy jáne qujatqa 10 túzetý engizildi. Onyń ishinde 5 túzetý redaktsiialyq-naqtylaý sipatynda, al qalǵan beseýi zańnyń jekelegen normalaryn zańnamalyq aktilerge sáikes keltirýdi kózdeidi. Atap aitqanda, maqsatty jinaqtaýda Biryńǵai zeinetaqy qoryndaǵy shottarǵa aýdara otyryp, ekinshi deńgeili bankterde, ulttyq poshta operatorynda ashylǵan bank shotynan aýdarýdy retteitin normalardaǵy dollardy teńgege aiyrbastaý «aýdarym kúnine» emes, «aýdarym sátine» dep ózgertildi. Sonymen qatar, «QR Tuńǵysh Prezidenti – Elbasy týraly» Konstitýtsiialyq Zańnyń qoldanylýy toqtatylýyna bailanysty terminologiialyq birizdendirý úshin «Qazaqstan Respýblikasynyń arnaýly memlekettik organdary týraly» Zańyna túzetý engizildi. Senat engizgen túzetýler zańnyń tujyrymdamalyq erejelerin ózgertpeidi. Joǵaryda aitylǵandardy eskere otyryp, Májilis komiteti Senatynyń ózgeristerimen jáne tolyqtyrýymen kelisýdi usynady», - dedi Májilis depýtaty Berik Beisenǵaliev.
Jalpy otyrys barysynda palata depýtattary Senat engizgen túzetýlermen kelisti.
Atap aitqanda, Memleket basshysy 2022 jylǵy 1 qyrkúiektegi Qazaqstan halqyna arnaǵan Joldaýynda «Ulttyq qor – balalarǵa» atty jobany iske asyrýdy usynǵan edi. Bul joba - óskeleń urpaqtyń eresek ómirge naqty joldama alýyna baǵyttalǵan alǵashqy qadam. Qazir resmi derekter boiynsha elimizde 18 jasqa deiingi balalardyń jalpy sany shamamen 6,7 mln adamdy qurap otyr. Zańǵa sáikes Ulttyq qordyń investitsiialyq tabysynyń 50 paiyzyn 18 jasqa deiingi barlyq jastaǵy balalar arasynda teń bólý kózdelgen. Ulttyq qor qarajaty bilim alýǵa jáne turǵyn úi jaǵdaiyn jaqsartýǵa baǵyttalǵan naqty eki maqsatta paidalanylady.
Budan buryn habarlanǵandai, biyl 12 qazanda Senattyń jalpy otyrysynda «Qazaqstan Respýblikasynyń keibir zańnamalyq aktilerine Ulttyq qordan balalarǵa arnalǵan qarajatty esepteý, tóleý jáne paidalaný máseleleri boiynsha ózgerister men tolyqtyrýlar engizý týraly» Zańnyń jekelegen baptary maquldanbady. Bul rette, atalǵan baptardyń jańa redaktsiiasyn usyna otyryp, qujat Májiliske qaitarylǵan edi.
Bul turǵyda zańnyń keibir erejelerin ishinara sáikestendirý eskerilgen. Munymen qosa, Ulttyq ál-aýqat qorynyń jalǵyz aktsioneriniń quzyretin reglamentteitin qaitalanatyn normalardy alyp tastaý qarastyryldy. «Qazaqstan Respýblikasynyń Tuńǵysh Prezidenti – Elbasy týraly» Konstitýtsiialyq Zańnyń qoldanylýy toqtatylýyna bailanysty «Qazaqstan Respýblikasynyń arnaýly memlekettik organdary týraly» Zańnyń normalaryna sáikes keltirý qamtylǵan. Bankter men salymshylar arasynda daýly jaǵdailardyń týyndaý táýekelderin boldyrmaý maqsatynda paidalanylmaǵan nysanaly jinaqtardy tóleý qarajatyn banktik shottardan BJZQ shottaryna AQSh dollarymen aýdarý kezinde «aýdarym kúnine» emes, «aýdarym sátine» teńgemen aiyrbastaý eskerilgen.
