Mańǵystaý oblysynda Kaspii itbalyqtarynyń qyrylýyna qatysty taǵy bir derek tirkeldi. Túpqaraǵan aýdanyna qarasty Baýtin aýyly mańyndaǵy jaǵalaýdan 15 itbalyqtyń óleksesi tabyldy. Alaida olardyń neden ólgenin anyqtaý ázirge múmkin bolmai otyr, dep habarlaidy ult.kz.
Mańǵystaý oblysy boiynsha balyq inspektsiiasy basqarmasynyń málimetinshe, oqiǵa týraly aqparat 2026 jylǵy 12 qazanda túsken. Aqtaý qalasynyń turǵyny teńiz jaǵalaýynan itbalyqtardyń ólekselerin baiqaǵan. Kelesi kúni aýmaqty tekserý úshin arnaiy jedel top qurylǵan.
Tekserý jumystaryna balyq inspektsiiasy basqarmasynyń, janýarlar dúniesin qorǵaý mekemesiniń, «Kaspii itbalyǵy» memlekettik tabiǵi rezervatynyń, Ekologiia departamentiniń jáne veterinariialyq qyzmettiń ókilderi qatysqan.
Mamandar jaǵalaýdan 15 itbalyqtyń óleksesin tapqan. Biraq olardyń qatty shirip ketkeni sebepti zerthanalyq zertteý júrgizýge qajetti tin úlgilerin alý múmkin bolmaǵan. Saldarynan janýarlardyń naqty neden qyrylǵany ázirge belgisiz kúiinde qalyp otyr.
Quzyrly organnyń aldyn ala boljamy boiynsha, itbalyqtar biraz ýaqyt buryn teńizde qyrylyp, ólekseleri sýda qalqyp júrgen bolýy múmkin. Keiin ońtústik-batystan soqqan qatty jel olardy jaǵaǵa shyǵarǵan.
Qazir ólekselerdi arnaiy poligonǵa jetkizip, joiý jumystary uiymdastyrylyp jatyr. Degenmen negizgi suraq ashyq kúiinde qalýda: Kaspii itbalyqtarynyń ólimine ne sebep boldy?
Aita keteiik, buǵan deiin de Mańǵystaý oblysynda Kaspii itbalyqtaryna qatysty taǵy bir jaǵdai tirkelgen bolatyn.
