Búgin QR Parlamenti palatalarynyń birlesken otyrysynda QR Úkimetiniń jáne Respýblikalyq biýdjettiń atqarylýyn baqylaý jónindegi esep komitetiniń 2021 jylǵy respýblikalyq biýdjettiń atqarylýy týraly esepterin talqylap, bekitti, dep habarlaidy QazAqparat.
«Respýblikalyq biýdjettiń negizgi parametrleri atqaryldy. Túsimder 100,8%-ǵa oryndalyp, 12,7 trln teńge boldy. Shyǵystar 99,2%-ǵa igerildi jáne 15,2 trln teńgeni qurady. Biýdjet tapshylyǵy jalpy ishki ónimge shaqqanda 3,1%-dy qurady. Jalpy alǵanda, memleket óziniń áleýmettik jáne basqa da mindettemelerin tolyq kólemde oryndady», - dedi Premer-Ministrdiń orynbasary–Qarjy ministri Erulan Jamaýbaev.
2021 jyly Jalpy ishki ónimniń ósimi 4 paiyzdy qurady. Ekonomikanyń barlyq negizgi salalarynda oń nátije boldy. Máselen, ónerkásiptik óndiris kólemi 3,8 %, qurylys salasy 7,6 paiyzǵa, kólik 3,6 %, saýda 9,2 % ósti. Negizgi kapitalǵa salynǵan investitsiialar kólemi 3,5 % ulǵaidy. Jumyssyzdyq 4,9% deńgeiinde saqtaldy.
Munymen qosa, Úkimet basshysynyń orynbasary qazirgi kezde memleket qaryzy qaýipsiz deńgeide ekenin aitty.
Óz kezeginde Respýblikalyq biýdjettiń atqarylýyn baqylaý jónindegi Esep komitetiniń tóraǵasy Natalia Godýnova Ulttyq jobalar aiasynda salynatyn nysandardyń ár sharshy metrine shyǵyn limitin bekitýdi usyndy.
«2021 jyly memlekettik josparlaý júiesiniń ózgerýimen este qaldy – memlekettik baǵdarlamalardan ulttyq jobalarǵa kóshtik. Byltyrǵy kúzden bastap Úkimet 10 ulttyq jobany iske asyrýǵa kiristi. Onyń bárinde biýdjettik qarjylandyrýǵa basymdyq berilgen bolatyn. Ókinishke qarai, ol jospar oryndalmady. Jobalardyń 43 paiyzy jetkilikti qarjylandyrylǵan joq. Al eń negizgi máselelerdi tiimdi sheshý úshin tolyq kólemde qarjylandyrý qajet. Sondyqtan Ulttyq jobalardy túzetip, qarjylyq múmkindikterge sáikestendirý kerek. Bilýimizshe, Úkimet bul jumysty bastap ta ketti», - dedi Godýnova.
Sonymen qatar Esep komitetiniń tóraǵasy biýdjetti josparlaýdyń birjyldyq júiesine qaita kóshýdi usyndy.
Esep qujattaryn talqylaý barysynda depýtattar biýdjetterdiń kiris bazasyn odan ári jetildirý, memleket aktivterin basqarý tetikteri, qarjy monitoringi júiesiniń pármendiligi, salyq jáne keden ákimshilendirýleriniń tiimdiligin jetildirý máselelerin kóterdi. Jalpy alǵanda, depýtattyq korpýs biýdjetke qatysty anyqtalǵan kemshiliktirdi atap, ony aldaǵy ýaqytta eskerýdi usyndy.
