Parlament Cenaty Táýelsizdiktiń otyz jyldyǵyna bailanysty raqymshylyq jasaý týraly zańdy qabyldap, Prezidenttiń qol qoiýyna jiberdi, dep habarlaidy Sputnik Qazaqstan.
Qansha adam raqymshylyqqa ilikti?
Ishki ister ministri Erlan Turǵymbaevtyń aitýynsha, zań jobasynyń maqsaty – asa aýyr emes jáne aýyrlyǵy ortasha qylmys úshin jazadan bosatý jáne keibir aýyr, asa aýyr qylmystar úshin jaza merzimin qysqartý.
"Raqymshylyq ardagerlerge, kámeletke tolmaǵandarǵa, jasy úlkenderge, birinshi jáne ekinshi toptaǵy múgedekterge, qoǵamǵa qaýip tóndirmeitin adamdarǵa qoldanylady", - dedi Turǵymbaev senat otyrysynda.
Zań jobasy memlekettik organdarmen, qoǵam qairatkerlerimen jáne sarapshylarmen talqylandy, ǵylymi-quqyqtyq saraptamalar jasaldy.
Ministrdiń aitýynsha, qazir respýblikada 64 mekeme men 16 tergeý izoliatorynda 34 myń adam bar. Onyń 30 myńyna sot úkimi shyqqan. Qalǵan 4 myń adamǵa qatysty tergeý júrgizilip jatyr, qamaýda otyr. 93%-i aýyr jáne asa aýyr qylmys jasaǵany úshin túrmege jabylǵan. 45%-i onyń aldynda birneshe ret sottalǵan. Sonymen qatar, 32 myń adam probatsiialyq baqylaýda tur.
"Zań jobasy boiynsha 2 292 sottalýshyǵa, probatsiialyq baqylaýda turǵan 11 753 adamǵa raqymshylyq jasalady. Nátijesinde 1 myń adam qamaýdan bostandyqqa shyǵady, 3881 adam probatsiialyq baqylaýdan bosatylady. 1330 sottalýshynyń, probatsiiada turǵan 7492 adamnyń jaza merzimi qysqartylady", - dedi ol.
Sondai-aq sotqa deiingi tergeý óndirisindegi 5 myń qylmystyq is qysqartylady. Onyń ishinde 1674 adam qylmystyq jaýaptan bosatylady. 1471 adamǵa sot organdarynyń jaza merzimin qysqartý nemese bosatý erejeleri qoldanylady.
Aýyr jáne asa aýyr, sondai-aq terroristik jáne ekstremistik qylmystarǵa barǵan adamdar raqymshylyqqa ilikpeidi.
Shet elde sottalǵan qazaqstandyqtar
Ishki ister ministriniń aitýynsha, qazir Qazaqstannyń túzeý mekemelerinde shet memlekettiń úkimimen sottalǵan 35 azamat jazasyn ótep jatyr. Onyń ishinde 31 qazaqstandyq – Reseide, Belarýs pen Qyrǵyzstanda eki-eki adamnan sottalǵan.
"Olardyń tek bireýi ǵana raqymshylyqqa iligedi. Ol aýyr qylmys úshin tórt jylǵa sottalǵan bolatyn. Úsh jyly ótti, tek bir jyly qaldy. Sol úshin ol azamat osy raqymshylyq týraly zań jobasyna kelip tur", - dep túsindirdi Turǵymbaev.
Al qalǵan 34 adam – asa aýyr jáne aýyr qylmys úshin sottalǵandar.
Parlament senaty zańdy biraýyzdan qabyldady. Endi qujatqa prezident qol qoiady.
