Elbasy Nursultan Nazarbaev Parlament Senatynyń depýtattarymen aqyldasýǵa jii kelip turatynyn aitty. Bul týraly Tuńǵysh Prezident «Qurmetti Senator» tósbelgisi men kýáligin tapsyrýǵa arnalǵan saltanatty sharada málim etti, dep habarlaidy QazAqparat tilshisi.
«Sizderge zor rizashylyǵymdy aitqym keledi. Osy ataqpen («Qurmetti Senator» - avt.) aralaryńyzǵa kelip turamyn, ózimniń oiymdy ári pikirimdi aitamyn. Sizdermen aqyldasyp turatyn bolamyn. Barlyǵymyzdyń istep júrgen jumysymyz bir arnaǵa toǵysady - ol Táýelsiz Qazaqstannyń bolashaǵy. Qazirgi Oraza ait kezinde Alladan elimizge baq pen bereke, tynyshtyq, otbasylarymyzǵa amandyq, halqymyzǵa zor baqyt tileimin!», - dedi Elbasy.
Budan buryn habarlanǵandai, búgin QR Parlamenti Senatynda Tuńǵysh Prezident-Elbasy Nursultan Nazarbaevqa «Qurmetti Senator» tósbelgisi men kýáligi tabystaldy.
QR Tuńǵysh Prezidenti - Elbasynyń demokratiialyq, zaiyrly, quqyqtyq jáne áleýmettik memleket retinde konstitýtsiialyq-quqyqtyq negizderin qalyptastyrýdaǵy, sondai-aq otandyq parlamentarizmdi ornyqtyrýdaǵy jáne damytýdaǵy sińirgen tarihi eńbegin, Konstitýtsiiany, adamnyń jáne azamattyń quqyqtary men bostandyqtaryn qorǵaýǵa, qoǵamnyń birligin qamtamasyz etýge, eldiń strategiialyq damý baǵdaryn aiqyndaýǵa qosqan asa zor úlesin moiyndai otyryp, QR Parlamenti Senaty Elbasy Nursultan Nazarbaevqa «Qurmetti Senator» mártebesin berý týraly sheshimdi qabyldady.
