Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine turǵyn úi qatynastary máseleleri boiynsha ózgerister men tolyqtyrýlar engizý týraly» Zańy qabyldandy, dep habarlaidy QazAqparat tilshisi.
Atap aitqanda, zań jobasy bir top Parlament depýtattarynyń bastamashylyǵymen ázirlendi. Bul turǵyda «Turǵyn úi qatynastary týraly», «Memlekettik jastar saiasaty týraly», «QR Memlekettik nagradalar týraly» zańdaryna túzetýler eskerilgen. Usynylyp otyrǵan túzetýlerdiń negizgilerine toqtalsaq, kópbalaly otbasy uǵymyn «Neke (erli-zaiyptylyq) jáne otbasy týraly» kodeksine sáikes keltirý eskerilgen. Bul zańnamalyq aktiler arasyndaǵy qaishylyqty joiady.
«Ekinshiden, «satyp alý quqynsyz jalǵa beriletin turǵynjai» uǵymyn engizilmek. Bul tabysy tómen halyqtyń áleýmettik osal toptaryna arnalǵan. Satyp alý quqyǵynsyz jalǵa beriletin turǵyn úidiń turaqty kommýnaldyq qoryn qurýǵa mumkindik beredi», - dedi Májilis depýtaty Shavhat Ótemisov zań jobasy boiynsha baiandama jasai otyryp.
Úshinshiden, «Altyn alqa», «Kúmis alqa» alǵandar nemese buryn «Batyr ana», sondai-aq I jáne II dárejeli «Ana dańqy» ataǵyn alǵan kópbalaly analar men kópbalaly otbasylar sanaty úshin turǵyn úi alýǵa jeke kezektilik engizý qarastyrylǵan. Kópbalaly otbasylarǵa turǵyn úidi birinshi kezekte alý quqyǵynyń berilgeni - osy zań jobasynyń mańyzdy ózgeristeriniń biri bolyp sanalady. Osy sanatqa jatatyn úi alýǵa úmitkerlerdi baspana alǵanǵa deiin kezekten shyǵarýǵa bolmaidy.
«Qazirgi ýaqytta kezekte turǵan kópbalaly otbasylardyń sany 31 725-ke jetti. Kópbalaly otbasylardy jalǵa beriletin turǵyn úimen qamtamasyz etý maqsatynda «Nurly jer» baǵdarlamasy boiynsha jyl saiyn 50 mlrd teńge qarajat bólinetin bolady. Osynyń arqasynda jylyna keminde 6 myń páter tapsyrylady», - dedi depýtat.
Munymen qosa, memlekettik jastar saiasatynyń negizgi baǵyttaryna jumys isteitin jastar úshin qoljetimdi baspana júiesin damytýdy engizý qarastyrylǵan. Sondai-aq, memlekettik jastar saiasaty jónindegi ýákiletti organdy satyp alý quqyǵynsyz jalǵa beriletin turǵyn úidi berý qaǵidalaryn bekitý quzyretimen qamtamasyz etý máselesi qarastyrylǵan.
«Bul túzetýler Elbasynyń tapsyrmasy boiynsha jumys isteitin jastardy jalǵa beriletin turǵyn úimen qamatamasyz etýge múmkindik beredi. «Nurly jer» baǵdarlamasynyń aiasynda 2019-2025 jyldary Nur-Sultan, Almaty jáne Shymkent qalalarynda jumys isteitin jastar úshin jyl saiyn keminde 1 myń jalǵa beriletin turǵyn úi salý josparlanýda. Jumys isteitin jastar úshin bul jaqsy múmkindik. Qaralyp otyrǵan zań jobasynyń qabyldanýy kópbalaly otbasylardyń jáne jumys isteitin jastardyń baspana máselesin jedel sheshý úshin zańnamalyq negizdi qalyptastyrady», - dedi Shavhat Ótemisov.
