Foto ashyq derekkózden alyndy
Parlament palatalarynyń birlesken otyrysynda «QR Tuńǵysh Prezidenti – Elbasy týraly» Konstitýtsiialyq zańnyń kúshi joiyldy dep taný týraly» Konstitýtsiialyq zań qabyldandy, dep habaralaidy QazAqparat.
Otyrysta «QR Tuńǵysh Prezidenti – Elbasy týraly» Konstitýtsiialyq zańnyń kúshi joiyldy dep taný týraly» Konstitýtsiialyq zań jobasy eki oqylymda qaraldy.
Atalǵan zań jobasy jalpyulttyq referendým nátijesinde Qazaqstan Konstitýtsiiasyna engizilgen ózgeristerdi iske asyrý maqsatynda ázirlengen.
«Atap aitqanda, Konstitýtsiiaǵa engizilgen túzetýlerge sáikes Qazaqstan Respýblikasy Tuńǵysh Prezidentiniń mártebesi men ókilettigi Respýblika Konstitýtsiiasymen jáne konstitýtsiialyq zańmen aiqyndalady degen normany kózdeitin Konstitýtsiianyń 46-baby 4-tarmaǵy alynyp tastaldy. Osyǵan orai, quqyqtyq negizdiń joq ekendigin eskere otyryp, bul zań jobasymen Konstitýtsiialyq zańnyń kúshin joiý kózdeledi», - dedi Májilistiń zańnama jáne sot-quqyqtyq reforma komitetiniń tóraǵasy Arman Qojahmetov.
Qos palatanyń depýtattary eki oqylym qorytyndysy boiynsha atalǵan zańdy qabyldaý jóninde sheshim qabyldady.
11 qańtarda Májilistiń jalpy otyrysynda atalǵan zań jobasy boiynsha birlesken komissiianyń quramyna enetin depýtattar iriktelgen bolatyn. Osylaisha, Májilisten Bekjanov Berik Aidarbekuly, Erýbaev Serik Sársenuly, Smailov Erlan Valeriiuly komissiia quramyna kirdi.
Al 12 qańtarda Senat depýtattary birlesken komissiianyń múshelerin sailady. Nátijesinde atalǵan komissiianyń quramyna senatorlar Vladimir Volkov, Sultanbek Mákejanov jáne Dúisenǵazy Mýsin endi.
Byltyr jyl aiaǵynda Májilis tóraǵasy Erlan Qoshanov atalǵan zańnyń kúshin joiý máselesi Parlamentte 2023 jyldyń basynda qaralatynyn aitqan edi.
«Sol zańda kórsetilgen artyqshylyqtardyń barlyǵy kúshin joiady. Birinshi prezidentke de, bolashaq prezidentterge de eks-prezidentke qatysty normalar birdei qoldanylady. Eger zań kúshin joisa, onda qarastyrylǵan immýnitettiń zańdy kúshi bolmaidy», - dedi Májilis spikeri.
2022 jyldyń basynda Senat memlekettik bastamalardy Elbasymen kelisý qajettiligin joiýdy usynǵan.
Byltyrǵy 2 aqpanda Parlament Elbasy týraly zańǵa túzetýdi qabyldady.
Biyl Konstitýtsiialyq sot Konstitýtsiianyń 62-babynyń 4-tarmaǵyn resmi túsindirý, naqtylap aitqanda Tuńǵysh Prezident týraly zańnyń kúshin joiý máselesi boiynsha normativtik qaýly shyǵardy. Konstitýtsiialyq sot «Elbasy týraly zańnyń Qazaqstanda qoldanysta qalýyna quqyqtyq negiz joq» dep tanydy.
Sondai-aq, buǵan deiin Nursultan Nazarbaevtyń «Qurmetti senator» mártebesi joiylǵany belgili bolǵan edi.
