Birdi-ekili jemqordyń kesirinen tutas bir salanyń jumysyna kóleńke túsip jatady. Sol sebepti, jemqorlyqpen qoǵam bolyp kúresýimiz kerek. Parlament Májilisiniń depýtaty Beibit Mamraev osyndai pikirbildirdi, dep habarlaidy QazAqparat.
«Ómirde paradokstar az emes. Adamnyń densaýlyǵyn saqtaý boiynsha úlken tehnologiialarǵa Qazaqstannyń qoly jetip jatyr, ekinshi jaǵynan oqý mekemelerindegi paraqorlyq jaily másele kóterip otyrmyz. Jer men kóktei máseleler, iá?! Jyldar boiy jemqorlyqpen kúresip kelemiz. Memlekettik satyp alýda da, kóptegen salada kezdeskenimen, jemqorlyq bilim salasynda erekshe baiqalady. Sebebi, bul salada bizdiń qoǵam jemqorlyqpen jii betpe-bet keledi. Bir jaǵynan alyp qarasańyz, jas stýdentterge, bozbala men boijetkenderge jemqorlyq jiirkenishti bolýy kerek edi. Biraq, jaǵymsyz jailar áli de kezdesip jatady», - dedi Beibit Mamraev Úkimettiń baspasóz ortalyǵyndaǵy brifingte.
Májilis depýtatynyń aitýyna qaraǵanda, qazirgi tańda kún tártibinde jemqorlyqqa qarsy kúres júrgizý úshin búkil qoǵam birige bilýi tiis.
«Meniń oiymsha, bizdiń bárimiz osy máseleni qolǵa alyp, sheshilý jolyn izdeýimiz kerek. Oqý mekemeleriniń muǵalimderiniń arasynda nelikten jemqorlar kóbeiip tur? Olar óz áreketterin nemen aqtaidy? Bir jaǵynan tómengi ailyq deýi múmkin. Biraq, kim mamandyq tańdaýda kedergi keltirdi, mamandyqty aýystyrýǵa bireý qarsylyq tanytyp tur ma? Tómengi ailyqty jeleý etip, jemqorlyqty aqtaý – qylmysqa teń», - dedi ol.
Beibit Mamraevtyń aitýyna qaraǵanda, jemqorlyqqa jol bergen adamdardyń keselinen búkil bilim salasyna kóleńke túsedi.
Eske sala ketsek, «Nur Otan» partiiasy Saiasi keńesiniń keńeitilgen otyrysynda QR Tuńǵysh Prezidenti – Elbasy Nursultan Nazarbaev sybailas jemqorlyqpen kúresti barynsha kúsheitip, qatardy «tazartý» kerektigin málim etken bolatyn.Sonymen qatar JOO-lardaǵy jemqorlyq máselesi Qaýipsizdik keńesinde qaralatynyn atap ótti.
