Parlament Májilisiniń depýtaty Ábdimanap Bekturǵanov bilimge qatysty jan basyna shaqqandaǵy qarjylandyrýdy engizý protsesine qatysty alańdaýshylyǵyn aitty, dep habarlaidy "Ult aqparat".
«Bizdiń depýtattyq saýalymyz. Birinshiden, jan basyna shaqqandaǵy qarjylandyrýǵa tek qalalyq jalpy bilim beretin 1594 mektep ǵana kóshti. 2018 jyly tolyq jinaqty aýyldyq mektepterde jan basyna shaqqandaǵy qarjylandyrýdy synaqtan ótkizý jáne keiinnen tolyq kólemde engizý toqtatylyp, bul reforma aýyldyq bilim berý uiymdaryn qamtymady.
Elimizdegi 3987 tolyq jinaqty mektepterdiń, aýyldyq mektepteri 2393-ti quraidy. Olardy jan basyna shaqqandaǵy qarjylandyrýdan alyp tastaý, bizdiń pikirimizshe, qala men aýyl mektepteri arasyndaǵy alshaqtyqty azaitpai, qaita odan ári tereńdete túsedi», - dedi depýtat Májilistiń jalpy otyrysynda QR Premer-Ministriniń orynbasary Eraly Toǵjanovtyń atyna joldaǵan saýalynda.
Onyń paiymynsha, jan basyna shaqqandaǵy qarjylandyrýǵa tolyq kólemde kóshýdi baiaýlatýǵa bolmaidy.
«Ekinshiden, jan basyna shaqqandaǵy qarjylandyrýdyń qoldanystaǵy modeli «aqsha oqýshyǵa arnalady» qaǵidatyna sai kelmeidi dep esepteimiz. Oqýshy bir óńirden ekinshi óńirge aýysqan kezde, tiisti shyǵyndar oqýshynyń sońynan ermeidi», - dedi Bekturǵanov.
Joǵaryda aitylǵandardyń negizinde mynadai usynystar engizildi:
- 2021-2022 oqý jylynan bastap tolyq jinaqty aýyldyq mektepterde jan basyna shaqqandaǵy qarjylandyrý tetigin jáne olar úshin tiisti ádistemeni ázirleý jónindegi máseleni qaraý;
- «aqsha oqýshyǵa arnalady» degen negizgi qaǵidatty iske asyrý maqsatynda, oqýshylardyń esebin júrgizý jáne ishki kóshi-qonǵa monitoring jasaý úshin jan basyna shaqqandaǵy qarjylandyrý jónindegi Ulttyq bilim berý derekqorynda basqa memlekettik organdardyń qoldanystaǵy derekqorlarymen bir mezgilde integratsiialai otyryp, jeke júieni ázirleý.
