Búgin Parlament palatalarynyń birlesken otyrysy ótip, onda jetinshi sailanǵan Parlamenttiń birinshi sessiiasy resmi túrde jabyldy, dep habarlaidy "Ult aqparat".
Atap aitqanda, depýtattar biylǵy 1 qyrkúiekke deiin parlamenttik kanikýl dep jariialanatyny týraly arnaiy qaýly qabyldady.
«Búgin biz jetinshi shaqyrylǵan Parlamenttiń alǵashqy sessiiasyn aiaqtap otyrmyz. Bul sessiia jumysy qasietti Otanymyz Qazaqstanymyzǵa 30 jyl tolǵan mereili kezeńde bastaldy. Ata-babamyz ańsaǵan Táýelsizdik árbir otbasyn, árbir qazaqstandyqtyń zor maqtanyshy jáne baǵa jetpes bailyǵy bolyp sanalady. Sebebi dál osy 30 jyldyń ishinde bizdiń elimiz barlyq salada zor tabystarǵa jetti. Búgingi kúni Qazaqstanymyz búkil álem moiyndaǵan bedeli joǵary, irgesi berik qýatty memleketke ainaldy», - dedi Májilis Tóraǵasy Nurlan Nyǵmatýlin.
Osy oraida ol Táýelsizdik jyldaryndaǵy QR Tuńǵysh Prezident Nursultan Nazarbaevtyń eńbegine toqtaldy.
«Búginde osy 30 jyl buryn negizin qalaǵan, maqsaty aiqyn, bolashaǵy zor «Qazaqstandyq joldy» Memleket basshysy Qasym-Jomart Kemeluly Toqaev odan ári tabysty jalǵastyryp keledi. Qazirdiń ózinde el damýyna naqty serpin beretin mańyzdy bastamalar, birqatar saiasi- ekonomikalyq, áleýmettik reformalar nátijeli qolǵa alyndy. Onyń barlyǵyn zań jaǵynan qamtamasyz etip kele jatqan qos palataly kásibi Parlamenttiń qurylǵanyna da biyl 25 tolyp otyr. Bul árqashanda Qazaqstannyń zańnamalyq tiregi bolyp kele jatqan Parlament úshin óte mańyzdy oqiǵa. Osyndai tarihi kezeńde bizdiń depýtattyq korpýstyń róli de, jaýapkershiligi de burynǵydan da arta tústi», - dedi Májilis Tóraǵasy.
N. Nyǵmatýlinniń aitýynsha, biyldyń qańtar aiynda ótken kezekti Parlament sailaýy elimizde demokratiiany odan ári nyǵaitýǵa, qoǵamdyq yntymaqtastyqty kúsheitýge jáne saiasi jańǵyrtýǵa jańa serpin berdi. Osy sailaý nátijesinde Májilis quramy 70 paiyzǵa jańardy. Sonymen birge jańa quram barlyq sala boiynsha bilikti tulǵalarmen tolyqty.
«Búkil álemge taraǵan koronavirýs indeti Qazaqstandy da oryn aldy. Sońǵy bir jyldan astam ýaqyttan beri elimiz pandemiia saldarymen kúres júrgizip keledi. Eldegi jaǵdai barshamyzdyń ómirimizge, jumysymyzǵa kóptegen ózgerister ákelse de, Parlament bir kúnge de óz jumysyn toqtatpady. Elimizdiń tehnologiialyq jetistikterin paidalana otyryp, belsendi eńbek etti. Barlyq jiyn, jumys toptary, komitetterdiń keńeitilgen otyrystary, jergilikti ári halyqaralyq kezdesýler kóp jaǵdaida onlain formatta ótti», - dedi ol.
