Parlament biýdjetti tiimdi paidalanýǵa qatań baqylaý jasap keledi. Bul týraly búgin Parlament palatalarynyń birlesken otyrysynda Májilis tóraǵasy Nurlan Nyǵmatýlin aitty, dep habarlaidy QazAqparat.
«Osy Parlamenttik sessiia kezinde barlyq fraktsiia ókilderi ádettegidei memleketimizdiń ekonomikalyq jáne qarjy-biýdjet saiasatyn qoldaýǵa erekshe kóńil bóldi. Sebebi qarjy salasy elimizdiń damýyn, halqymyzdyń áleýmettik jaǵdaiyn qamtamasyz etýdiń basty kepili. Bul baǵytta biz 2021-2023 jyldarǵa arnalǵan respýblikalyq biýdjet týraly zańǵa tiisti túzetýler engizip, Elbasynyń jáne Memleket basshysynyń tapsyrmalaryn oryndaýdy qamtamasyz ettik. Sonyń nátijesinde áleýmettik qoldaýǵa, densaýlyqqa, bilim, shaǵyn jáne orta biznes, eńbekpen qamtý salalaryna, infraqurylym, basqa da mańyzdy baǵyttardy damytýǵa qosymsha úlken qarajat bólindi», - dedi palata tóraǵasy.
Mysaly, onyń dereginshe, áleýmettik salany nyǵaitýǵa 374 mlrd teńge qaralsa, 140 mlrd teńge qarjy repýblikalyq jáne jergilikti joldardy jóndeýge, qaita qalpyna keltirýge baǵyttaldy. Eńbekpen qamtýdyń jol kartasy aiasynda 100 mlrd-qa jýyq teńge, al «Aýyl – el besigi!» baǵdarlamasyn júzege asyrýǵa 70 mlrd teńge bólindi.
«Bir másele týraly erekshe aitý kerek. Ol – elimizde qalyptasqan koronavirýs indetine qarsy kúreske bailanysty. Bul máseleniń elimiz úshin, halqymyz úshin mańyzdylyǵyn eskere otyryp, biýdjetten 265 mlrd teńge qarajat qaraldy. Osynyń barlyǵy, árine az aqsha emes. Sondyqtan Parlament barlyq qarajatty maqsatqa sai tiimdi paidalanýǵa árqashanda qatań baqylaý jasap keledi. Sebebi, biýdjettiń árbir tiyny sapaly, nátijeli, tiimdi jumsalýy kerek. Ony árbir qazaqstandyq azamat bilýi qajet jáne sezý qajet», - dedi Nurlan Nyǵmatýlin.
