Senattyń beibit jinalystar týraly zań jobasyn Májiliske qaitarýy – elimizde demokratiialyq protsesterdiń is júzinde damyp jatqanyn kórsetedi.
Senatta qaralǵan búgingi zań jobayna qatysty Eýraziialyq integratsiia institýtynyń direktory Erlan Sairov osylai pikir bildirdi, dep habarlaidy QazAqparat.
«Qazaqstan Prezidenti Qasym-Jomart Toqaevtyń «Halyq únine qulaq asatyn memleket» kontseptsiiasy qazir is júzine asyp jatyr. Beibit jinalystar týraly zań Qazaqstan qoǵamynda qyzý jáne jan-jaqty talqylanǵan zań jobalarynyń biri. Bul zańdy ázirlegen Aqparat jáne qoǵamdyq damý ministrligi. Ministrlik zańnyń kontseptsiiasynyń ózi jasalǵan kezde búkil qoǵammen kelisip, túsinýge tyrysty. Májiliske túsken kezde Nurlan Nyǵmatýlin osy zań boiynsha Qazaqstan men shetel sarapshylaryn shaqyryp, úlken dóńgelek ústel ótkizgen bolatyn», - deidi Erlan Sairov.
Saiasattanýshynyń aitýynsha, zań áli de qyzý talqylanyp jatyr.
«Qoǵamnyń bir bóligi bul zańnyń keibir aspektisine qarsy. Sondyqtan Senattyń bul zańdy qaitadan Májiliske qaitarýy – búgingi tańda bizdiń elimizde demokratiialyq protsesterdiń is júzinde damyp jatqanyn, sonymen birge azamattardyń pikirine depýtattardyń, Parlamenttiń qulaq asyp jatqanyn kórsetedi. Meniń oiymsha, osyndai kelisimderdiń arqasynda Qazaqstan qoǵamy qoldanýǵa qolaily zańǵa ie bolady», - dedi Erlan Sairov.
