Senattyń jalpy otyrysynda «Qazaqstan Respýblikasynyń keibir zańnamalyq aktilerine Qarýly kúshterdiń, basqa da áskerler men áskeri quralymdardyń arsenaldary, bazalary men qoimalary janyndaǵy tyiym salynǵan aimaqtar men tyiym salynǵan aýdandar máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaidy QazAqparat.
«Bizdiń elimizde ǵana emes, búkil álemde oryn alatyn tabiǵi qubylystar men tehnogendik apattardan azamattardy qorǵaý máselesine erekshe nazar aýdarý qajet ekenin jaqsy bilesizder. Qujatty daiyndaýǵa bastamashy bolǵan Parlament depýtattary jumys barysynda oq-dárilerdi saqtaý arsenaldary, bazalary men qoimalary janyndaǵy tyiym salynǵan aimaqtardy, aýdandardy belgileý máselelerinde birtalai kemshilikter men problemalar oryn alatynyna kóz jetkizdi. Ol olqylyqtar ásirese Arys qalasyndaǵy bolǵan belgili oqiǵa barysynda kórinis tapty», - dep toqtaldy Senat depýtaty Nurjan Nursipatov.
Bul máselelerdi sheshý úshin Jer kodeksine, Ákimshilik quqyq buzýshylyq týraly kodekske, «Qazaqstan Respýblikasynyń qorǵanysy jáne Qarýly kúshteri týraly», «Qazaqstan Respýblikasyndaǵy sáýlet, qala qurylysy jáne qurylys qyzmeti týraly» zańdarǵa túzetý engizý eskerilgen.
Túzetýlerdi qabyldaý qarý-jaraq, áskeri tehnika jáne oq-dáriler arsenaldary, bazalary men qoimalarǵa tiesili memlekettik organdarmen tyiym salynǵan aimaq pen tyiym salynǵan aýdan aýmaǵynyń belgilengen shekaralaryn mindetti túrde jergilikti atqarýshy organdarmen kelisim jasai otyryp, ornalasqan jerin belgileý tetigin keshendi sheshýge múmkindik beredi.
«Zań jobasyn qabyldaý elimizge oń quqyqtyq jáne áleýmettik-ekonomikalyq áser etýi boljanady, óitkeni oq-dárilerdi saqtaý kezinde tótenshe oqiǵa týyndaýy yqtimal bolǵan jaǵdaida - turǵyndardy, azamattyq jáne basqa da infraqurylymnyń qorǵalýyn qamtamasyz etedi», - dedi senator.
