Resei Prezidenti Vladimir Pýtin jáne Ýkraina Prezidenti Vladimir Zelenskii jyl sońyna deiin Ýkraina shyǵysynda atysty toqtatý rejimin tolyq júzege asyrýǵa kelisti. 9 jeltoqsanda Parijde ótken "norman tórttigi" sammitinen keiin taratylǵan ortaq málimdemede osylai dep aitylady.
"Taraptar jyl sońyna deiin atysty toqtatý týraly kelisimdi tolyq jáne jan-jaqty júzege asyrý mindetin moinyna alady, atysty toqtatý úshin qajet barlyq sharalardy júzege asyrady" delingen málimdemede.
Buǵan qosa, Ýkraina men Resei jyl sońyna deiin "bárine bári" formýlasy boiynsha tutqyn almasýǵa kelisti. "Tutqyn almasýǵa daiyndalý úshin eń áýeli aýystyrylatyn adamdardyń tizimin jasaý kerek" dedi Vladimir Zelenskii. Kezdesýde sonymen birge "Qyzyl Krest" uiymynyń ustalǵan azamattarǵa kirýine kedergi jasalmaýy tiis ekeni aityldy.
Sammitte buǵan qosa, Donbasta taǵy úsh jańa aýdanda ásker taratý orny belgilenýi tiis ekeni aityldy. Taraptar reseishil separatister baqylaýyndaǵy aýmaq pen Ýkrainanyń qalǵan bóligi arasynda jańa ótkizý pýnkter ashylýy qajet dedi.
Tórt memleket basshysy separatister baqylaýyndaǵy aýmaqta jergilikti sailaý ótkizý máselesin tórt aidan keiin qaita talqylaýǵa kelisti.
Bul - Ýkraina men Resei basshylarynyń 2016 jyldan bergi alǵashqy kezdesýi. Biyl mamyr aiynda resmi túrde prezident qyzmetine kirisken Zelenskii Pýtinmen birinshi ret kezdesti.
Máskeý Ýkrainanyń shyǵysyndaǵy separatist qurylymdar men Kiev áskeri kúshteriniń qaqtyǵysyna tikelei qatysy bar ekenin joqqa shyǵaryp keledi. Alaida, Reseidiń separatisterge áskeri, ekonomikalyq jáne saiasi qoldaý kórsetip kelgeni jáne áskeri qaqtyǵysqa Resei kúshteriniń tikelei qatysy bar ekeni jaily dálelder jii keltiriledi.
Shilde aiynda Eýropa Odaǵy men Ýkraina ortaq málimdeme jasap, 2014 jyldyń aqpan aiynan beri Resei áskeri Ýkrainaǵa "agressiia" kórsetip keledi dep aitqan. Resei Donbastaǵy qaqtyǵysqa qatysy joǵyn aitady.
"Norman tórttigi" sammiti - Ýkrainanyń shyǵysyndaǵy janjaldy retteý úshin 2014 jyldan beri jumys istep kele jatqan Ýkraina, Resei, Frantsiia jáne Germaniia jetekshileri men syrtqy ister ministrliginiń kezdesý formaty.
