Foto: gov.kz
Dara tulǵanyń ǵasyrlyq mereitoiy – tek Qazaqstan úshin emes, búkil álem úshin de mańyzdy oqiǵa. Bul data IýNESKO-nyń halyqaralyq deńgeide atalyp ótetin merreitoilar tizimine engen, dep habarlaidy Ult.kz.
Mádeniet jáne aqparat ministrligi baspasóz qyzmeti málimetinshe, is-sharaǵa Qazaqstan Respýblikasynyń Mádeniet jáne aqparat ministri Aida Balaeva, diplomatiialyq korpýs pen shyǵarmashylyq ziialy qaýym ókilderi qatysty.
– Búgin Parij tórinde, IýNESKO-nyń mártebeli shtab-páterinde qazaq halqynyń uly kompozitory Nurǵisa Tilendievtiń 100 jyldyǵy joǵary deńgeide toilanyp otyr. Qazaq mýzykasy men óneriniń IýNESKO aiasynda laiyqty baǵalanýy – memleketimiz úshin úlken mártebe. Nurǵisa Tilendievtiń shyǵarmalary – qazaq halqynyń rýhani álemin pash etýmen qatar, jalpyadamzattyq qundylyqtardy dáripteitin biik óner týyndylary, – dedi Aida Balaeva quttyqtaý sózinde.
Is-sharanyń basty maqsaty – ulttyq mádeni muranyń bailyǵyn, kópǵasyrlyq dástúrler men halqymyzdyń mádenietin álemge nasihattaý. Kontsert baǵdarlamasynda kompozitordyń tanymal týyndylaryn «Otyrar sazy» orkestri oryndady. Ujymnyń kórkemdik jetekshisi ári dirijeri – qyzy Dinzýhra Tilendieva.
Sonymen qatar IýNESKO sahnasynda Qazaqstannyń belgili ártisteri Svetlana Aitbaeva, Álisher Kárimov, Farhat Kýbiev, Gaýhar Jumaǵulova, Asqar Muqiiat, Abai Qoishybaev, Rasýl Jarmambetov, Nurǵalym Amanbai, Aiagóz Hairýllina, Juldyz Baijuma óner kórsetti.
Nurǵisa Tilendievtiń shyǵarmashylyǵy Qazaqstan mádeni murasynyń ajyramas bóligine ainaldy. Onyń qalamynan 500-den astam mýzykalyq shyǵarma týyp, 50-den astam dramalyq qoiylym men 20 kórkem filmge mýzyka jazdy.
Nurǵisa Tilendiev Abai atyndaǵy Qazaq memlekettik akademiialyq opera jáne balet teatrynyń, Qurmanǵazy atyndaǵy halyq aspaptary akademiialyq orkestriniń bas dirijeri qyzmetin atqardy, keiin ózi «Otyrar sazy» folklorlyq-etnografiialyq orkestrin quryp, ujymnyń kórkemdik jetekshisi boldy.
