30 qyrkúiekte Parij birinshi okrýginiń meriiasynda «Rýhani Jańǵyrý» baǵdarlamasy aiasynda aýdarylǵan jáne jariialanǵan qazirgi qazaq prozasy men poeziiasy antologiiasynyń tusaýkeseri ótti, dep habarlaidy "Ult aqparat".
Frantsýz tilindegi qazaq ádebieti jinaqtaryn aýdarý jáne basyp shyǵarý jobasy Parijdiń birinshi okrýginiń meriiasy men elordalyq mádeni qaýymdastyqtyń qoldaýymen júzege asyryldy.
Olardyń usynystaryna sáikes, antologiiany áigili ádebiet baspasy Mishel de Miýl (Michel de Maule) basyp shyǵardy. Onyń óner men ádebietti nasihattaý jolyndaǵy aýdarma jáne baspa salasynda 30 jyldan astam tájiribesi bar. Baspanyń bas redaktory, áigili frantsýz lingvisti jáne aqyny Terri-de-La-Krýa (Thierry de La Croix) áriptesteriniń basty mindeti aýdarmanyń joǵary kórkemdik deńgeiin qamtamasyz etý ekenin atap ótti.
«Buǵan bizge Qazaqstanǵa sapar jáne avtorlarmen tikelei bailanys kómektesti. Bizdiń óte tanymal shyǵarmashylyq ujymymyz úlken jumys istedi jáne biz onyń nátijesimen maqtanamyz», - dedi baspager.
Tusaýkeserge ortalyq elordalyq okrýgtiń meri Jan-Fransýa Legare (Jean-François Legaret), Parij mádeni birlestiginiń prezidenti madam Karla Arigoni (Carla Arigoni), frantsýz oqyrmandaryna qazaq ádebietin usynǵan jinaqtardyń alǵy sóziniń avtorlary - Frantsiia akademiiasynyń turaqty hatshysy Elen Karrer d’Anko men áigili frantsýz aqyny Verner Lambersi, sondai-aq aýdarmashylar, jazýshylar, jýrnalister jáne Qazaqstannyń Frantsiiadaǵy elshiliginiń janyndaǵy Qazaqstan dostary klýbynyń músheleri qatysty.
Qazaqstan tarapynan sharaǵa QR Prezidentiniń kómekshisi, «Rýhani jańǵyrý» baǵdarlamasyn júzege asyrý boiynsha Ulttyq komissiia hatshysy Aida Balaeva, QR Frantsiiadaǵy Tótenshe jáne ókiletti elshisi Jan Ǵaliev, Ulttyq aýdarma biýrosynyń atqarýshy direktory Raýan Kenjehanuly, Qazaqstan Jazýshylar odaǵy tóraǵasynyń orynbasary Aqberen Elgezek qatysty.
Aida Balaeva óz sózinde qazirgi qazaq ádebietiniń úlgilerin aýdarý, jariialaý jáne taratý «Jahandaǵy zamanaýi qazaqstandyq mádeniet» jobasynyń ajyramas bóligi, onyń mindeti - qazaqstandyq kino, teatr, óner men mýzykany keńinen nasihattaý ekenin aitty.
«Biraq, bári ádebietimizge negizdelgen, bul halyq rýhynyń ózegi. Sondyqtan qazirgi 60 qazaqstandyq avtordyń tańdaýly týyndylaryn bir ýaqytta BUU-nyń 6 tiline aýdarý jáne basyp shyǵarý bizdiń búkil mádenietimiz úshin mańyzdy oqiǵa», - dedi A. Balaeva.
Frantsýz tilinde usynylǵan basylymdar barlyq iri frantsýztildi elderge jetkizilip, iri kitaphanalar, ýniversitetter men akademiialyq ortalyqtardyń qorlaryna jiberiledi. Jalpy alǵanda, 220 million adamdyq aýditoriiasy bar 30-dan astam eldegi 5 myńnan astam uiym qamtylady.
Joba týraly
Zamanaýi qazaq ádebietiniń úzdik úlgileriniń BUU 6 tiline aýdarmasy «Jahandaǵy zamanýi qazaqstandyq mádeniet» jobasy aiasynda júzege asyp otyr. Joba, óz kezeginde, Qazaqstan Respýblikasynyń Tuńǵysh Prezidenti – Elbasy N.Nazarbaevtyń bastamasymen qolǵa alynǵan «Rýhani jańǵyrý» baǵdarlamasynyń mańyzdy baǵyty sanalady. «Jahandaǵy zamanaýi qazaqstandyq mádeniet» jobasynyń mindeti – qazirgi zamanǵy Qazaqstannyń ádebiet, mýzyka, beineleý óneri, horeografiia, kino jáne teatr salalaryndaǵy mádeni qazynasyn álem jurtshylyǵyna tanystyrý.
