Foto:sport24.ru
Qazir álem nazary Parijde ótip jatqan Olimpiada oiyndarynda ekeni ras. Sporttaǵy kil myqtylar jinalatyn dúbirli dodanyń aiaqtalýyna da eki-aq kún qaldy. Osy ýaqytta ár sport súier qaýymnyń óz súiikti sportshysy, ár sportshynyń óz jankúieri qalyptasyp úlgerdi. Saiyskerlerdiń arasynda erekshe obrazdary men harizmasymen, basqa da qyzyqty sáttermen kózge túsip, halyqtyń gúbir-gúbir áńgimesine arqaý bolǵandary bar.
Qara násildi ánshi
Parij óz stilinde Olimpiadanyń ashylý saltanatyn Sena ózeninde romantikaǵa, sán-saltanatqa toltyryp ótkizdi.
Alaida Frantsiia halqynyń arasynda Parij Olimpiadasynyń ashylý saltanatynda basty juldyz bolyp, án salǵan Aia Nakamýraǵa qarsylar da az bolǵan joq. Onyń túpkilikti frantsýz emes, shyǵý tegi afrikalyq qara násildi bolýy daýdyń basty sebebine ainaldy.
Frantsiiany dúnie júzine óz ánderimen tanytyp júrgen Nakamýra báribir de Olimpiada tórinde óner kórsetti.
Foto: Franck Castel/Starface via ZUMA / TASS
Jumyrtqa daýy
Olimpiada oiyndary bastala salysymen sportshylarǵa arnalǵan ashanadan shý shyqty. Britandyq sportshylar jumyrtqa jegileri keletinin, biraq ashanada jumyrtqa joq ekenine narazy boldy. Sodan anyqtala kele Olimpiada qalashyǵynda biraz azyq-túlik jetispeitini anyqtalǵan.
Ákimshilik sportshylardan keshirim surap, olqylyqtyń ornyn toltyrýǵa ýáde berdi.
Olimpiadaǵa qatysqan eń jas jáne eń jasy úlken sportshylar
Biyl Parijdegi jazǵy Olimpiada oiyndarynyń eń jas qatysýshysy 11 jastaǵy qytailyq Chjen Haohao boldy. Tamyzda 12 jasqa tolatyn jetkinshek skeitbort týrnirinen synǵa túsipti.
Chjen jazǵy Olimpiada irikteýinde 51,73 upai jinap, 44 qatysýshy ishinde 20-oryn alǵan.
Foto:Getty Images via AFP
Al Olimpiadadaǵy eń egde sportshynyń jasy – 65-te. Ol - ispaniialyq shabandoz Hýan Antonio Himenes. Qart saiysker at sportynan qatysyp jatyr eken.
Foto:ANCCE1 / youtube.com
Olimpiadada sóz salý
Parij tek sporttyń qalasy emes, romantikanyń, mahabbattyń astanasy ekenin qytailyq sportshylar eske túsirdi. Olimpiadanyń altyn medalin ielengen Qytai badmintonshysy Hýan Iatsiýn seriktesi Chjen Syvei ekeýiniń marapaty bitkennen keiin, Qytai quramasynyń múshesi, Tokio Olimpiadasynyń kúmis júldegeri Liý Iýichen badmintonshy Iatsiýnǵa tizerlep turyp, usynys jasady.
Foto: Shina-news-online.com
Frantsiialyq jeńilatlet Alis Fino da ǵashyqtar qalasynda súiiktisine sóz saldy. Ol "máre syzyǵyn keskennen keiin kóp kútpei ózim usynys jasaiyn dep sheshtim" deidi. Ol márege tórtinshi bolyp keldi.
Ol óz suhbatynda "toǵyz minýttyń ishinde júgirip shyqsam sóz salamyn dedim. Toǵyz degen maǵan sáttilik ákeletin san. Biz toǵyz jyldan beri birgemiz. "Parijdegi mahabbat" dep jazylǵan ilgekti syiladym", – dedi sportshy.
Foto: Hannah Peters/Getty
Jeńilistiń kóz jasy
Eshqashan jeńilip kórmegen japon dziýdoshysy Ýta Abe ózbekstandyq Diora Keldiorovadan jeńilip qalǵannan keiin kóz jasyna erik berip, eńirep jylady. Al onyń qarsylasy Keldiorova óz jeńisin ózbek áielderine arnady.
Abe álemdik reitingte birinshi orynda turǵan, Tokio Olimpiadasynyń chempiony. Ol osy Olimpiadanyń basty favoriti sanalǵan edi. Japondyq dziýdoshynyń jeńilisti qalai aýyr qabyldaǵany dúiim jurttyń nazaryn aýdardy. Onyń eńirep jylaǵan daýysy tipti shýly zaldy ózine qaratty.
Foto: Dok. Twitter Paris Olympics
«Killer» sportshy
51 jastaǵy Iýsýf Dikech Parij Olimpiadasynda pnevamatikalyq tapanshamen atýdan jarysqa túsken. Serigi Shevval Ilaida Tarhanmen birge aralas synda kúmis júldege ie boldy.
Onyń jarysqa arnaiy kiim men kózildiriksiz, qulaqqapsyz shyǵyp, qolyn qaltasyna salyp júrip, Olimpiadanyń kúmis medalin alyp ketkeni kórermenderdi tańǵaldyrdy. Sóitip Iýsýf Dikechtyń fotosýretin kórgender oǵan «killer» siiaqty dep ázildep, Olimpiada memine ainaldyrdy. Qazirgi Iýsýfty Olimpiadany baqylap otyrǵan árbir kórermen biledi desek artyq emes.
Ol óz suhbatynda arnaiy kiim men qural-jabdyq asynsa ózin jaisyz sezinetinin, sondyqtan ózine yńǵaily kiimmen saiysqa shyqqanyn aitqan.
«Túrkiiada ǵana emes, álemde tanymal bolyp shyǵa keldim. Adamdar áleýmettik jelilerde meni belgilep, jekeme jazyp jatyr. Óte qýanyshtymyn", – dedi Iýsýf Dikech.
Túrik jandarmeriiasynda istegen Dikech 28 jasynan bastap kásibi sportpen ainalysa bastaǵan. Ol 2008 jyldan beri bes ret jazǵy Olimpiada oiyndaryna qatysqan.
Júkti sportshylar
Mysyrlyq semserlesýshi Nada Hafez qursaqtaǵy jeti ailyq balasymen Olimpiadaǵa qatysyp, 1/8 finalǵa deiin jetti. Úsh márte Olimpiada oiyndaryna qatysqan jas ana osy jolǵynyń jóni bólek deidi. Ol óz suhbatynda «eki adam semserleskenimen, úsh adam saiysqa tústi» -deidi.
Sadaq atýdan synǵa túsken ázerbaijandyq mergen Iailagiýl Ramazanovanyń da qursaǵynda jeti ailyq balasy bolǵan. Ol ózin qoldap jatqan jankúierlerge alǵysyn bildirdi. Sebebi aiaǵy aýyr bolyp júrip Olimpiadaǵa daiyndalý ońai bolmaǵan jáne óziniń jarystaǵy nátijesine kóńili tolmaǵan.
Foto:elitar.kz
Transgender daýy
Olimpiada oiyndarynda aljirlik boksshy Iman Helif italiialyq Anjela Karinamen jekpe-jekke shyqqan, alaida 46 sekýndyń ishinde Iman Helif qarsylasyna qatty soqqy jasap, Anjela Karina oiyndy toqtatqan. Italiialyq boksshy qarsylasynyń soqqysy joiqyn ekenin aityp, shaǵymdandy. Al Heliftiń óziniń alapat kúshin "kóp jylǵy eńbektiń jemisi" dep túsindirdi.
Foto:championat.com
Keiin aljirlik boksshyǵa qatysty «buryn er adam bolǵan, keiin jynysyn aýystyrǵan eken» degen sybys shyqty. Dál osylai taivandyq Lin Iýitinǵa qatysty da jel sóz tarady. Alaida bul sybys rastalmady.
Eki sportshy da áiel bolyp dúniege kelgen, transgender emes. Olar - interseks, iaǵni testosterony joǵary áielder. Bul sportshylarda XY erlerge tán horomosomalar anyqtalǵan.
Aita keteiik, Parijde ótip jatqan Olimpiada oiyndary áli aiaqtalǵan joq, iaǵni áli de nebir qyzyq kútýge bolady.
Al Qazaqstannyń enshisinde qazir 1 altyn, 3 kúmis, 3 qola júlde bar.
Baljan Jeńisqyzy, ULT.KZ
