Foto:olympic.kz
Parijdegi Olimpiada oiyndarynyń ashylý saltanatyna az ýaqyt qaldy. Úsh kúnnen soń tórtjyldyqtyń basty dodasy óz alaýyn jaǵady. Ázirge, uiymdastyrýshylar aldaǵy oiyndar jaily jańa ári qyzyqty derekterdi usynýda, dep jazady Olympic.kz.
Olimpiada kezinde tennisshiler oinaityn dop tanystyryldy. Úlken tenniste el namysyn bes sportshy qorǵaidy. «Rolan Garros» stadionynda Elena Rybakina, Iýliia Pýtintseva, Aleksandr Býblik, Aleksandr Shevchenko jáne Aleksandr Nedovesov (Býblikpen juptasyp synǵa túsedi) óner kórsetedi.
Áigili amerikalyq reper Snýp Dogg olimpiada alaýynyń estafetasyna qatysady. Ol 26 shilde kúni alaýdy alyp júrmek. Sondai-aq, ol Parijde amerikalyq NBC arnasynyń tilshisi bolyp jumys istemek.
Olimpiada aýyly resmi túrde ashylǵan soń, Frantsiia prezidenti Emmanýel Makron arnaiy keldi. Ol Olimpiadanyń búkil el úshin mańyzdylyǵyn alǵa tartyp, uiymdastyrýshylardyń aianbai eńbek etkenin atap ótti. Sonymen qatar, eriktiler men sportshylarǵa alǵys aitty.
Ázirge, Makronnyń Sena ózeninde júzýine qatysty aqpar joq. Buǵan deiin ol Parijdegi bul ózenniń qaýipsiz ekenin dáleldeý úshin, júzip shyǵatynyn aitqan edi. Al Parij meri Anna Idalgo óz ýádesinde turyp, on minýt ózende shomyldy. Sena ózeninde triatlon, ashyq sýda júzýden jarystar ótedi.
Al uzynqulaqtan jetken málimet boiynsha, ashylý saltanatynda olimpiada alaýyn jeńil atletikadan úsh dúrkin Olimpiada chempiony Mari-Joze Perek men dańqty fýtbolshy Zinedin Zidan jaǵýy múmkin.
Dańqty olimpiadashy, álem rekordshysy Ýsein Bolt ta Olimpiadadan syrt qalmaidy. Ol ózi kimge erekshe nazar aýdaratynyn da aitty.
«Meniń nazaryma túsken bir jigit bar. Ol – amerikalyq Errion Naiton. Ol endi jiyrmaǵa toldy. Biraq óte myqty. Bári talanttyń damýyna bailanysty», - dedi sprinter.
Olimpiada oiyndaryna satylǵan bilet sany da rekordyq kórsetkishke jetti. Bul týraly Halyqaralyq Olimpiada komiteti habarlady. Búginge deiin 8,8 million bilet satylyp ketken. Buǵan deiingi rekord Atlanta Olimpiadasyna tiesili bolatyn – 8,3 mln.
2024 jylǵy Olimpiada oiyndarynyń uiymdastyrý komitetiniń basshysy Toni Estangeniń ashylý saltanaty týraly az-kem aqparat berdi.
«Olimpiadanyń ashylý saltanaty qanshalyqty mańyzdy ekenin bilemiz. Sondyqtan da, biz áý bastan qulshynysymyz myqty boldy. Bul ashylý saltanaty bizdiń Oiynymyzdyń bar qulshynysyn kórsetip, Frantsiiadaǵy jaqsy nárselerdiń bárin pash etkenin qalaimyz», - dedi ol.
Sportshylar sherýi Sena ózeninde ótedi. Árbir delegatsiia óz qaiyǵymen júzip ótedi. Baǵyttyń uzaqtyǵy alty shaqyrymdy quraidy.
Parij Olimpiadasynda 80 qazaqstandyq sportshy synǵa túsedi. Alǵashqy básekeler 25 shildede bastalmaq. Sadaq atýshylar dál sol kúni synǵa túsedi. Qazirgi tańda sportshylar Olimpiadalyq aýylǵa jaiǵasty. Dziýdoshylar Frantsiiada jattyǵý júrgizýde, olar jaqyn arada olimpiadalyq aýylǵa qonystanady.
Qazaqstan quramasynyń týyn Aslanbek Shymbergenov pen Olga Safronova ustap shyǵady.
