Parijdiń Sharl de Goll áýejaiynda Mehran Kárimi Nasseri qaitys boldy. Ol osy áýejaida 1988 jyldan 2006 jylǵa deiin 18 jylǵa jýyq turyp, tanymal bolǵan edi, dep habarlaidy Azattyq.
Nasseri 1945 jyly Iranda týǵan. 1974 jyly ol anasyn izdep Londonǵa ushqan. Týystary oǵan "anasy Ulybritaniiada ekenin" aitqan.
1977 jyldan 1981 jylǵa deiingi arada Mehran Kárimi alty elden saiasi pana surap, aqyry Belgiiadan alǵan, sonda kitaphanada jumys istegen. 1988 jyly Nasseri qalaida Ulybritaniiaǵa barýǵa sheshim qabyldaǵan. Sóitip Parij arqyly ushpaq bolǵan. Kei joramalǵa qaraǵanda, Parijde qujatyn joǵaltqan. London qujatsyz adamdy Frantsiiaǵa qaitaryp jibergen. Frantsiia ishine kirýge quqyǵy bolmaǵan Mehran Kárimi Parij áýejaiynda qalǵan.
Ol áýejaidyń 2F terminalyndaǵy birneshe kresloǵa jaiǵasyp, zattaryn ainalasyna qoiyp ómir súrgen. Áýejaidaǵy ómirin qoiyn dápterine jazǵan, gazet-jýrnal oqyp ýaqyt ótkizgen.
1999 jyly Frantsiia bosqyn statýsyn berse de Nasseri 2006 jylǵa deiin áýejaida tura bergen.
Iran azamatynyń áýejaidaǵy ómiri qoǵam nazaryn aýdarǵan. Gollivýd rejissiori Stiven Spilberg 2004 jyly Nasseridiń bastan keshkeniniń jelisi boiynsha "Terminal" tragikomediiasyn túsirgen.
Film premerasynan keiin Nasseriden suhbat alǵysy keletin baspasóz kúrt kóbeigen.
2006 jyly Mehran Kárimi aýrýhanaǵa túsken. Aýrýhanadan shyqqan soń Spilberg filminen alǵan aqshasyna hostel jaldap turǵan.
Osydan birneshe apta buryn Nasseri 2F terminalyna qaita oralyp, 12 qarashada qaitys bolǵan. Áýejai ókilderi Kárimi ýaqyty jetip, óz ajalynan ólgenin aitady. Nasseridiń qaltasynda birneshe myń eýro aqsha bolǵan.
Áýejai qyzmetkerleri Nasseri árqashan qoǵam nazarynda boldy, ol kez kelgen sátte qalaǵan jaǵyna kete alatyn edi dep sipattaidy. Iran azamatyna áýejai qyzmetkerleri qamqorlyq kórsetken.
