پاريجدٸڭ شارل دە گولل ەۋەجايىندا مەحران كەريمي ناسسەري قايتىس بولدى. ول وسى ەۋەجايدا 1988 جىلدان 2006 جىلعا دەيٸن 18 جىلعا جۋىق تۇرىپ, تانىمال بولعان ەدٸ, دەپ حابارلايدى ازاتتىق.
ناسسەري 1945 جىلى يراندا تۋعان. 1974 جىلى ول اناسىن ٸزدەپ لوندونعا ۇشقان. تۋىستارى وعان "اناسى ۇلىبريتانييادا ەكەنٸن" ايتقان.
1977 جىلدان 1981 جىلعا دەيٸنگٸ ارادا مەحران كەريمي التى ەلدەن ساياسي پانا سۇراپ, اقىرى بەلگييادان العان, سوندا كٸتاپحانادا جۇمىس ٸستەگەن. 1988 جىلى ناسسەري قالايدا ۇلىبريتانيياعا بارۋعا شەشٸم قابىلداعان. سٶيتٸپ پاريج ارقىلى ۇشپاق بولعان. كەي جورامالعا قاراعاندا, پاريجدە قۇجاتىن جوعالتقان. لوندون قۇجاتسىز ادامدى فرانتسيياعا قايتارىپ جٸبەرگەن. فرانتسييا ٸشٸنە كٸرۋگە قۇقىعى بولماعان مەحران كەريمي پاريج ەۋەجايىندا قالعان.
ول ەۋەجايدىڭ 2F تەرمينالىنداعى بٸرنەشە كرەسلوعا جايعاسىپ, زاتتارىن اينالاسىنا قويىپ ٶمٸر سٷرگەن. ەۋەجايداعى ٶمٸرٸن قويىن دەپتەرٸنە جازعان, گازەت-جۋرنال وقىپ ۋاقىت ٶتكٸزگەن.
1999 جىلى فرانتسييا بوسقىن ستاتۋسىن بەرسە دە ناسسەري 2006 جىلعا دەيٸن ەۋەجايدا تۇرا بەرگەن.
يران ازاماتىنىڭ ەۋەجايداعى ٶمٸرٸ قوعام نازارىن اۋدارعان. گولليۆۋد رەجيسسيورٸ ستيۆەن سپيلبەرگ 2004 جىلى ناسسەريدٸڭ باستان كەشكەنٸنٸڭ جەلٸسٸ بويىنشا "تەرمينال" تراگيكومەديياسىن تٷسٸرگەن.
فيلم پرەمەراسىنان كەيٸن ناسسەريدەن سۇحبات العىسى كەلەتٸن باسپاسٶز كٷرت كٶبەيگەن.
2006 جىلى مەحران كەريمي اۋرۋحاناعا تٷسكەن. اۋرۋحانادان شىققان سوڭ سپيلبەرگ فيلمٸنەن العان اقشاسىنا حوستەل جالداپ تۇرعان.
وسىدان بٸرنەشە اپتا بۇرىن ناسسەري 2F تەرمينالىنا قايتا ورالىپ, 12 قاراشادا قايتىس بولعان. ەۋەجاي ٶكٸلدەرٸ كەريمي ۋاقىتى جەتٸپ, ٶز اجالىنان ٶلگەنٸن ايتادى. ناسسەريدٸڭ قالتاسىندا بٸرنەشە مىڭ ەۋرو اقشا بولعان.
ەۋەجاي قىزمەتكەرلەرٸ ناسسەري ەرقاشان قوعام نازارىندا بولدى, ول كەز كەلگەن سەتتە قالاعان جاعىنا كەتە الاتىن ەدٸ دەپ سيپاتتايدى. يران ازاماتىنا ەۋەجاي قىزمەتكەرلەرٸ قامقورلىق كٶرسەتكەن.
