Qazaqstannyń Frantsiiadaǵy Elshiliginde Eýropa elderinde turatyn otandastar men qandastardyń basqosýy saltanatty túrde ashyldy. Is-shara Qazaqstannyń Frantsiiadaǵy Elshiligi jáne Qyzylorda oblysy ákimdiginiń qoldaýymen, «Otandastar qory» KeAQ men Qazaq-frantsýz-túrik qaýymdastyǵynyń (AKFT Paris) birlesken uiymdastyrýymen ótkizildi, dep habarlaidy ult.kz.
Negizgi maqsaty – sheteldegi qazaq diasporasynyń birligin nyǵaitý, tarihi Otanmen bailanysty damytý jáne mádeni-gýmanitarlyq yntymaqtastyqty damytý.
Is-sharanyń ashylýynda Qazaqstannyń Frantsiiadaǵy Tótenshe jáne Ókiletti Elshisi Gúlsara Arystanqulova, Qyzylorda oblysy ákiminiń orynbasary Ardaq Zebeshev, «Otandastar qory» KeAQ vitse-prezidenti Alibek Jurqadam, Túrkiianyń Ádilet jáne damý partiiasy tóraǵasynyń orynbasary Rashida Iýksel, Qazaq-frantsýz-túrik qaýymdastyǵynyń tóraǵasy Rejep Giýnai jáne «Tildes KZ» Speaking jobasynyń jetekshisi Larisa Aldabergenova sóz sóiledi.
Qazaqstan Elshisi óz sózinde Parij tórinde bul basqosýdyń sheteldegi qazaqtardyń rýhani birligin nyǵaitatyn mańyzdy alańǵa ainalǵanyn atap ótti. Ol qazaq halqynyń tarihi tamyry Altyn Orda murasymen sabaqtas ekenin aityp, búginde Qazaqstannyń Eýropa men Aziiany jalǵaityn senimdi kópir retindegi róli artyp kele jatqanyn erekshe jetkizdi. Sonymen qatar, ana til, ulttyq rýh jáne tarihi jady barsha qazaqty biriktiretin basty qundylyqtar ekenin nazar aýdardy.
Jiyn aiasynda «Otandastar qory» KeAQ qazaq qaýymdastyqtarynyń jetekshileri men belsendileriniń qatysýymen dóńgelek ústel ótkizdi. Kezdesý barysynda «Otandastar qory» KeAQ vitse-prezidenti Álibek Jurqadam uiymnyń qyzmeti men júzege asyryp jatqan jobalary týraly aqparat berip, qatysýshylardy ortaq bastamalarǵa belsendi qatysýǵa shaqyrdy. Sondai-aq, qatysýshylar aldaǵy kezeńdegi birlesken jobalar men yntymaqtastyq baǵyttaryn talqylady.
Baǵdarlama aiasynda Qyzylorda oblystyq filarmoniiasynyń ónerpazdary kontserttik baǵdarlama usynyp, óńir qolónershileri ulttyq qolóner buiymdarynyń kórmesin uiymdastyrdy.
Otandastardyń basqosýy aldaǵy eki kún boiy jalǵasady. Baǵdarlama aiasynda Garj-le-Goness qalasynda Eýropadaǵy qazaq jastary arasynda fýtbol týrniri ótkizilip, sondai-aq mádeni-kópshilik is-sharalar men ulttyq mádenietke arnalǵan arnaiy baǵdarlama uiymdastyrylady.
Basqosýǵa Ulybritaniia, Germaniia, Niderland, Finliandiia, Ispaniia, Norvegiia, Shveitsariia, Frantsiia, Chehiia, Italiia, Portýgaliia, Polsha, Shvetsiia, Daniia, Belgiia, Majarstan, Túrkiia men Mońǵoliiadan kelgen qazaqstandyqtar men qandastar qatysty.
