«Parasat joly» óńirlik ortalyqtarynyń jumysy adaldyq, parasattylyq qaǵidattaryn qalyptastyrýǵa, ulttyq mádeniet pen rýhaniiat qundylyqtaryn ilgeriletýge yqpal etedi. Bul týraly QR Mádeniet jáne sport ministri Aqtoty Raiymqulova «Parasat joly» jobasynyń tanystyrylymynda aitty, dep habarlaidy QazAqparat.
«Ózderińiz biletindei, búgingi is-shara «Adaldyq alańy» jobasy aiasynda elimizdiń barlyq óńirindegi oblystyq kitaphana bazasynda «Parasat joly» óńirlik ortalyqtaryn ashýǵa arnalǵan.
Men óz sózimdi el Prezidenti Qasym-Jomart Kemeluly Toqaevtyń «Táýelsizdik bárinen qymbat» atty maqalasyndaǵy «Egemendigimizdiń máńgilik úshtaǵany – Altaidan Atyraýǵa, Alataýdan Arqaǵa deiin keń kósilgen baitaq jerimiz, ananyń aq sútimen boiymyzǵa daryǵan qasterli tilimiz jáne barlyq qiyndyqtan halqymyzdy súrindirmei alyp kele jatqan bereke-birligimiz. Biz osy úsh qundylyqty kózdiń qarashyǵyndai saqtaimyz» degen úzindimen bastaǵym keledi.
Bizdiń maqsatymyz – keiingi urpaqqa qýatty ekonomikasy men berik rýhani-adamgershilik negizi qalyptasqan memleketti qaldyrý», - deidi QR Mádeniet jáne sport ministri Aqtoty Raiymqulova.
Onyń aitýynsha, búginge deiin «Adaldyq alańy» jobasy aiasynda Mádeniet jáne sport ministrligi aýyz toltyryp aitarlyqtai jumys istedi.
«2019 jyly qarasha aiynda iske qosylǵan jobalyq keńse Ministrlikte jáne barlyq baǵynysty mekemede sybailas jemqorlyqqa qarsy is-qimyl men onyń aldyn alýǵa baǵyttalǵan qyzmetti qyzý júrgizip jatyr. Jobalyq keńse qyzmetkerleri jumysy barysynda sybailas jemqorlyqqa qarsy is-qimyl agenttigimen tyǵyz qarym qatynas ornatty», - deidi ol.
Qazirgi ýaqytta agenttik qyzmetkerleriniń kómegimen Ministrlikke baǵynysty uiymdar bazasynda sybailas jemqorlyqqa qarsy aýdit, Aqparat jáne qoǵamdyq damý ministrligimen birlesip áleýmettik beinerolikter daiyndaý siiaqty birqatar is-shara ótkizildi.
«Biyl 8 qańtarda Ulttyq akademiialyq kitaphanada ashylǵan «Parasat joly» jańa ortalyǵy - «Adaldyq alańy» jobalyq keńsesi men QR Sybailas jemqorlyqqa qarsy is-qimyl agenttigi arasyndaǵy tyǵyz is-qimyldyń kezekti nátijesi.
Endi, mine, búgin biz elimizdiń barlyq óńirindegi oblystyq kitaphana bazasynda «Parasat joly» óńirlik ortalyqtarynyń ashylýyna qatysyp otyrmyz. Jańa ortalyqtardyń jumysy adaldyq, parasattylyq qaǵidattaryn qalyptastyrýǵa, ulttyq mádeniet pen rýhaniiat qundylyqtaryn ilgeriletýge yqpal etedi dep úmittenemin», - deidi ministr.
Budan bólek, búgin Sybailas jemqorlyqqa qarsy is-qimyl agenttigi men Mádeniet jáne sport ministrligi arasynda Ózara yntymaqtastyq týraly memorandýmǵa qol qoiylady. Memorandýmnyń maqsaty – azamattyq qoǵamda sybailas jemqorlyqqa qarsy is-qimyl máseleleri boiynsha ózara yntymaqtastyqty nyǵaitý, parasattylyq ideologiiasyn ilgeriletý jáne kez kelgen sybailas jemqorlyq áreketterine múldem tózbeýshilikti qalyptastyrý.
