2022 jylǵy qysqy paralimpiada júldegeri Aleksandr Gerlitske «Qazaqstan Respýblikasynyń Eńbek sińirgen sport sheberi» ataǵy berildi, dep habarlaidy QazAqparat.
Sportshyǵa tósbelgini QR Premer-Ministriniń orynbasary Eraly Toǵjanov tabystady.
Saltanatty is-sharaǵa QR Mádeniet jáne sport ministri Dáýren Abaev, «Qazaqstan Respýblikasynyń Ulttyq paralimpiada komiteti» QB Bas hatshysy Erlan Súleimenov jáne Paralimpiada quramasynyń bas bapkeri Vasilii Kolomiets qatysty.
«Qazaqstannyń barlyq paralimpiada quramasyna osyndai jetistik úshin alǵys aitqym keledi. Sizder keremet nátije kórsettińizder. Qaisarlyq pen tabandylyqtaryńyzdyń arqasynda bizdiń elimiz osy oiyndarda laiyqty óner kórsetti. Bul nátijeniń sońynda sportshylardyń ózderine jáne olardyń jattyqtyrýshylaryna ǵana belgili orasan zor eńbek jatyr», - dedi Eraly Toǵjanov.
Premer-Ministrdiń orynbasary buqaralyq sportty damytý jáne inkliýzivti ortany qurý máselelerine erekshe nazar aýdardy, onyń aitýynsha, bul máseleler Memleket basshysynyń jeke baqylaýynda.
Eraly Toǵjanov memleket tarapynan sportty dáripteý úshin barlyq qajetti jaǵdailardy jasaýdyń jalǵasatyndyǵyn jetkizdi.
«Aleksandr ózine júktelgen joǵary senimdi aqtady. Sizdiń jetistikterińiz-myqty rýhani jigerdiń jarqyn úlgisi. Bizdi aldaǵy jarystarǵa daiyndyq boiynsha úlken jumys kútip turǵanyn atap ótkim keledi. Biz osy paralimpiadada joǵary nátijeler kórsetken QHR men Ýkrainanyń tájiribesin muqiiat zerdeleimiz», - dedi Dáýren Abaev.
Sondai-aq, salalyq mekeme basshysy sportshylardyń jetistikterine paralimpiada komitetiniń qosqan úlesi týraly da baiandap berdi.
Óz kezeginde Aleksandr Gerlits qazaqstandyqtarǵa qoldaý kórsetkeni úshin alǵys aityp, quramanyń barlyq jattyqtyrýshylar shtabynyń úilesimdi jáne kásibi jumysyn atap ótti.
Esterińizge sala keteiik, XIII qysqy Paralimpiada 2022 jylǵy 4-13 naýryz aralyǵynda Beijińde ótti.
Oǵan álemniń 50 elinen 700-den astam sportshy qatysty. Qazaqstan quramasy bir qola medalmen 17-orynǵa taban tiredi.
Ulttyq paralimpiada quramasyna 5 sportshy kirdi: Erbol Hamitov, Aleksandr Gerlits, Sergei Ýsoltsev, Iýrii Berezin jáne Denis Petrenko.
