Soltústik Qazaqstan oblysynyń ákimi Qumar Aqsaqalov búgin Beijińde ótken olimpiada jáne paralimpiada oiyndarynyń qatysýshylarymen kezdesti, dep habarlaidy QazAqparat.
Qumar Aqsaqalov kezdesýdiń basty keiipkeri, paralimpiada júldegeri Aleksandr Gerlitske bir bólmeli páterdiń kiltin jáne 5 mln teńgeniń sertifikatyn tabys etti.
«Biz sportshylardyń jarysyn kórip, eleńdep otyrdyq. Aleksandr Gerlits úmitimizdi aqtap, álemniń myqty sportshylarynyń biri ekenin dáleldedi. Olar Erbol Hamitovpen birge komandalyq estafetada besinshi orynnan kórindi. Sizderge osy jeńisterińiz úshin alǵysymdy bildiremin, jas sportshylarǵa, qiyn jaǵdaiǵa tap bolǵan jandarǵa úlgi kórsettińizder», - dedi Qumar Aqsaqalov.
Olimpiada jáne paralimpiadaǵa qatysqan basqa sportshylar da marapatsyz qalmady. Olarǵa óńir basshysy qurmet gramotalaryn, alǵys hattardy jáne aqshalai sertifikattar tabys etti.
Esterińizge salaiyq, Aleksandr Gerlits Beijińde ótken Paralimpiadada Qazaqstan qorjynyna jalǵyz medal salǵan edi. Ol parabiatlonnan synǵa túsip, úshinshi bolyp keldi. Budan basqa sportshy parabiatlon jáne parashańǵy jarysynda, estafetada úsh ret besinshi orynnan kórindi. Jalpy elimizden bul oiyndarǵa 5 sportshy qatysty.
