Ómir boiyna bas bostandyǵynan aiyrylǵan qylmyskerler jazasyn óteitin Jitiqaradaǵy 161/3 qylmystyq koloniiasynyń burynǵy bastyǵyna qatysty sot úkimi shyqty, dep habarlaidy "Ult aqparat" oblystyq sottyń baspasóz qyzmetine silteme jasap.
Buǵan deiin Qostanai oblysy politsiia departamentiniń baspasóz qyzmeti Jitiqaradaǵy «Qara búrkit» túrmesi bastyǵynyń qamaýǵa alynýyna bailanysty túsinik bergen bolatyn.
Is derekterine súiensek, 2019 jyldyń jeltoqsan aiynda koloniia bastyǵy bolyp taǵaiyndalǵan A.Ábilov 2020 jyldyń 26 tamyzynda mekeme qyzmetkeri J. arqyly 1 mln teńge para alǵany úshin qamaýǵa alynǵan.
Keiin «Qara búrkit» bastyǵynyń qyzmettik kabinetinde zańsyz oq-dári saqtaǵany anyqtaldy.
«29 qańtar kúni Jitiqara aýdandyq sotynyń úkimimen koloniianyń burynǵy basshysy bopsalaý jolymen para alǵany úshin jáne zańsyz qarý-jaraq saqtaǵany úshin 8,5 jylǵa bas bostandyǵynan aiyrý jazasyna kesildi. Sot A.Ábilovti ádilet podpolkovnigi sheninen jáne memlekettik qyzmet salasynda laýazymdy mindet atqarý quqynan ómir boiy aiyrdy» delingen oblystyq sottyń aqparatynda.
Úkim zańdy kúshine engen joq.
