Foto: ashyq derekkóz
Aqmola oblysynda joǵalyp ketken 76 jastaǵy zeinetker Vladimir Gromovtyń denesi tabyldy. Atalǵan fakti boiynsha qylmystyq is qozǵaldy, dep habarlaidy Ult.kz.
Zeinetker 18 sáýir kúni ózi turatyn “Úmit Shańyraq” qarttar men múgedekterge arnalǵan pansionattan shyǵyp ketken. Ol sońǵy ret jeńil kiimmen Qyzyl Iar aýyly baǵytyna qarai ketip bara jatqan jerinen beinebaqylaý kameralaryna túsip qalǵan.
Ony izdeý jumystaryna politsiia qyzmetkerleri, eriktiler jáne jergilikti turǵyndar jumyldyryldy. Izdeý eki kúnge sozylyp, 20 sáýir kúni keshke onyń máiiti tabyldy.
Aqmola oblystyq politsiia departamentiniń málimetinshe, oqiǵa boiynsha qylmystyq is qozǵalǵan. Máiitten zorlyq-zombylyq belgileri anyqtalmaǵan.
Qazirgi ýaqytta qajetti sot-meditsinalyq saraptamalar taǵaiyndaldy. Olardyń qorytyndysy boiynsha túpkilikti protsessýaldyq sheshim qabyldanady. Tergeý amaldary jalǵasyp jatyr.
QR Qylmystyq-protsestik kodeksiniń 201-babyna sáikes ózge málimetter jariia etilmeidi.
