Qazaqstan Prezidenti Qasym-Jomart Toqaevtyń Almatyǵa jasaǵan jumys sapary I.Jekenova atyndaǵy qalalyq klinikalyq juqpaly aýrýlar aýrýhanasynyń jańa filialyna barýdan bastaldy, dep habarlaidy "Ult aqparat" Aqordaǵa silteme jasap.
Qasym-Jomart Toqaev 500 adamǵa statsionarlyq meditsinalyq járdem berýge arnalǵan jáne zamanaýi qurylǵylarmen jabdyqtalǵan palatalardy aralap kórdi.
Memleket basshysyna qaladaǵy meditsinalyq-demografiialyq ahýal jáne COVID-19 indetine qarsy kúresý úshin qabyldanǵan sharalar, sondai-aq, meditsinalyq jedel járdem qyzmetiniń jumysy jóninde baiandaldy. Prezident meditsina qyzmetkerlerimen áńgimelesý barysynda ulttyq densaýlyq saqtaý salasyn odan ári damytý, meditsinalyq mekemelerdi qajetti qurylǵylarmen jabdyqtaý, tósek-oryn men infraqurylymdy jańartý, sondai-aq, dárigerlerdiń eńbekaqysyn arttyrý máselelerine toqtaldy.
«2023 jylǵa qarai meditsina qyzmetkerleriniń eńbekaqysyn búkil ekonomikadaǵy ortasha jalaqydan eki ese joǵary deńgeige jetkizý mindeti qoiylady. Alǵashqy meditsinalyq sanitarlyq járdem berý isin damytýǵa basa mán beriledi. Ókinishke qarai, biz bul salaǵa ýaqytynda nazar aýdarmadyq. Epidemiia mundai is-qimyldardyń qate ekenin kórsetti. Qazir jibergen qatelikterge durys kóńil bólip, olardy túzetýimiz kerek. Árine, meditsina árdaiym basty nazarymyzda bolady», – dedi Qasym-Jomart Toqaev.
Memleket basshysy koronavirýstyń yqtimal jańa tolqynyna daiyn bolýdyń mańyzdy ekenin atap ótti. Osy rette azamattarymyzdyń ómiri men densaýlyǵyn saqtaý úshin barlyq resýrsty jumyldyrý qajettigin aitty.
«Qazir búkil álemdegi jaǵdai kúrdeli. Eýropa men Amerikada koronavirýstyń ekinshi tolqyny ótip jatyr. Osyndai jaǵdaida biz qyraǵylyq tanytyp, daiyn bolýymyz qajet. Pandemiianyń birinshi tolqynynan jaqsy sabaq aldyq. Bul tájiribeniń paidasy bolady. Árine, qiyn boldy, qatelikter jiberildi, sonyń ishinde, Densaýlyq saqtaý ministrligi tarapynan da aǵattyqtar ketti. Bul qatelikterdi jumys barysynda jóndeýge týra keldi. Degenmen, kez kelgen tájiribeniń, tipti aýyr bolsa da, paidasy bar. Sondyqtan ekinshi tolqynǵa daiyn bolaiyq. Sodan keiin búkil dúnie júzimen, halyqaralyq qoǵamdastyqpen birge barlyq qiyndyqty laiyqty túrde eńserýge tiispiz», – dedi Prezident.
Kezdesý sańynda Memleket basshysy pandemiiaǵa qarsy kúrestiń kúrdeli jaǵdaiynda atqarǵan qajyrly eńbekteri úshin dárigerlerge rizashylyq bildirdi.
