Koronavirýs pandemiiasyna bailanysty ártúrli syrqattardy emdeýge arnalǵan sheteldik preparattardyń keibirin Qazaqstanǵa jetkizý qiyndap otyr, – dep habarlaidy "Ult aqparat".
«Álbette, qazir keide shaǵymdar túsedi. Álemdik pandemiiaǵa bailanysty buǵan deiin jolǵa qoiylǵan logistikalyq protsestiń bári joiyldy, kóptegen elde shekara jabyldy. Tipti, óz qajettiligine bailanysty keibir memleket osyǵan deiin shetelge shyǵaryp kelgen preparattardy endigári basqa elderge satpaitynyn jariia etti. Zaýyttardyń keibiri toqtap ta qaldy. Máselen, Úndistandaǵy jaǵdai boiynsha fors-major jaǵdai týyndady. Sebebi ol eldegi Maharashtra shtatynda zaýyttardyń bári tolyǵymen jabyldy. Úndistanmen zoledron qyshqyly boiynsha kelisimshartymyz bar edi. Eldiń ózi karantinge jabylyp qalǵandyqtan, ony alyp shyǵý qiynǵa ainaldy», - dedi «SQ-Farmatsiia» JShS-niń basqarma tóraǵasy Berik Shárip Densaýlyq saqtaý ministrliginiń Facebook-paraqshasynda ótken suhbatta.
Onyń aitýynsha, kúrdeli másele týyndaǵanymen eki eldiń arasyndaǵy kelissózderdiń arqasynda mamyr aiynyń sońyna deiin zoledron qyshqylyn Qazaqstanǵa jetkizý jospary bar. Sondai-aq ol taǵy 20 preparatty alyp kelýde problema týyndap otyrǵanyn aitty.
«Jetkizý jaǵynan qiyndyq týǵyzyp turǵan 20 preparat bar. Onyń bárin de álemdik pandemiiaǵa bailanysty Qazaqstanǵa alyp kelý qiynǵa ainalyp otyr», - dedi ol.
Máselen, bir memleket Qazaqstanǵa osyǵan deiin kelisilgen preparattardy endi jetkizbeitinin jariia etse, onda basqa kásiporyndarmen kelissóz bastalady.
«Al eger kelisimshart jasasqan kásiporyn belgili bir ýaqyt surasa, onda oǵan preparatty kesh te bolsyn jetkizý quqyǵy kompaniiaǵa beriledi. Qazir álemde adamdardyń qozǵalysy shektelgenimen, tamaq pen dári-dármek tasymalyna ruqsat bar. Degenmen keibir preparat boiynsha logistika sipatyndaǵy qiyndyqtar týyndaǵanyn aita ketý kerek», - dedi Berik Shárip.
