Eńbek salasynda kúrdeli kemshilikterdi anyqtaǵan COVID-19 pandemiiasy jappai jumyssyzdyqqa ákep soqtyrýy múmkin. Al bul áleýmettik, ekonomikalyq jáne saiasi kúizeliske alyp keledi. Bul týraly BUU Bas hatshysy Antoniý Gýterrish eskertti, dep habarlaidy "Ult aqparat" BUU jańalyqtary saityna silteme jasap.
«COVID-19 pandemiiasy eńbek naryǵyn túgel ózgertti. Ózgeris árbir jumysker, árbir kásiporyn, jer sharynyń túkpir-túkpirine áser etken. Júzdegen million adam jumystan aiyryldy», - dep málimdedi BUU basshysy, uiymnyń «COVID-19 pen eńbek naryǵy» atty jańa zertteýin tanystyrý kezinde. Antoniý Gýterrish daǵdarystyń birinshi aiynda ekonomikanyń beiresmi sektorynda eńbek etip júrgenderdiń tabysy 60 paiyzǵa qysqarǵanyn atap ótti.
Kóptegen kompaniialar men olardyń qyzmetkerleri eńbek jaǵdaiynyń ózgerip jatqan jaǵdaiyna beiimdele bastaǵan. Mysaly, milliondaǵan adam onlain rejimdegi jumysqa aýysty. Kóp jaǵdaida qashyqtan eńbek etý jemisin bere bilgen. Alaida barlyq jumys onlain rejimde atqaryla almaidy. Oǵan qosa, pandemiia kezeńinde birqatar qyzmet suranystan shyǵyp qalǵan.
Ekonomister jabylýǵa týra kelgen shaǵyn jáne orta kásiporyndar endi qaita ashylmaitynyna alańdap otyr. Sebebi, olar pandemiia saldarynan jumysyn jalǵastyra almaidy.
Osyǵan bailanysty Bas hatshy ózi usynǵan jańa zertteýge súiene otyryp, barlyq memleketterge qaýipti topqa kiretin kásiporyndar, olardyń jumysshylaryna tez arada qoldaý kórsetip, jumys oryndaryn saqtap qalýǵa, jabylmaýyna kómektesýdi usyndy.
«Daǵdarystan keiin eńbek salasy burynǵydai bolyp qalmaýy tiis. Barlyq azamat úshin laiyqty jumys oryndaryn qurý úshin úilestirilgen jahandyq, óńirlik jáne ulttyq deńgeide kúsh salatyn ýaqyt keldi», - dep atap ótti BUU hatshysy.
Ol 2030 jylǵa deiingi kezeńge turaqty damý salasyndaǵy taqyrypty erekshe nazarǵa alyp, bul daǵdarystan myqty bolyp ótýge shaqyrdy.
