Biznesti qoldaýǵa qatysty júieli jumystardy ári qarai da jalǵastyrýdyń mańyzy zor. Bul týraly Parlament Senatynyń Tóraǵasy Máýlen Áshimbaev málim etti, dep habarlaidy "Ult aqparat".
«Biz búgin asa mańyzdy salany qarap, talqylaý úshin jinalyp otyrmyz. Shaǵyn jáne orta kásipkerlikti damytý – el ekonomikasynyń ósimin jáne onyń turaqtylyǵyn qamtamasyz etýdiń negizgi sharttarynyń biri. Qazirgi ýaqytta bul máseleniń mańyzy burynǵydan da arta tústi.
Pandemiia birqatar salaǵa, onyń ishinde shaǵyn jáne orta bizneske de óz zardabyn tigizdi. Kólik, saýda, qyzmet kórsetý, qoǵamdyq tamaqtaný, qonaq úi jáne jyljymaityn múlik biznesi aitarlyqtai shyǵynǵa ushyrady», - dedi M. Áshimbaev Qazaqstanda shaǵyn jáne orta kásipkerlikti damytý salasyndaǵy memlekettik saiasatty jáne quqyqtyq retteýdi jetildirý taqyrybyndaǵy Parlamenttik tyńdaýda.
Osy oraida Senat Tóraǵasy pandemiiadan kem degende 800 myń qazaqstandyq kásipker zardap shekkenin jetkizdi.
«Qazirgi tańda shaǵyn jáne orta kásiporyndar shamamen 3 million 300 myń qazaqstandyqty jumyspen qamtyp otyr.
Bul ekonomikalyq belsendi halyqtyń 39 paiyzyn quraidy. Sondyqtan osy salanyń áleýmettik mańyzy óte zor. Shaǵyn jáne orta biznes Memleket basshysynyń basty nazarynda. Prezidentimiz biylǵy Joldaýynda shaǵyn jáne orta bizneske qosymsha kómek retinde keshendi qoldaý sharalaryn usyndy», - dedi ol.
Pandemiiaǵa bailanysty jeńildikpen beriletin nesie kólemi aitarlyqtai ulǵaidy. Nesie tólemin 6 paiyzǵa deiin tómendetý úshin memlekettik sýbsidiia berilip jatyr.
«Memlekettik organdar men kvazimemlekettik sektorǵa tiesili jyljymaityn múlik nysandaryn jalǵa alǵany úshin tólenetin jaldaý aqysy jyl sońyna deiin toqtatyldy. Shaǵyn jáne orta biznes ókilderiniń eńbekaqy qoryna túsetin aýyrtpalyq jeńildetildi. Salyq kodesine birqatar mańyzdy túzetý eńgizilýde. Shaǵyn jáne orta biznesti eki jylǵa qosylǵan qun salyǵynan jáne áleýmettik salyqtan bosatý usynyldy. Prezident tapsyrmasy boiynsha tabystyń 3 paiyzy kóleminde bólshek salyq engiziletin boldy. Osy jáne basqa sharalar shaǵyn jáne orta kásipkerlikti damytýǵa óz úlesin qosatyny sózsiz», - dedi Senat Tóraǵasy.
