2021 jyldyń birinshi jartyjyldyǵynda memlekettik biýdjet kiristeri jospary 107,5% oryndaldy. Bul týraly QR Premer-Ministri Asqar Mamin Úkimettiń keńeitilgen otyrysynda aitty, dep habarlaidy QazAqparat.
«2021 jyldyń birinshi jarty jyldyǵynda memlekettik biýdjet kiristeri josparǵa qatysty 107,5% oryndaldy. Al respýblikalyq biýdjet kiristeri 101%, jergilikti biýdjetter 120,3% oryndaldy. Memlekettik biýdjet shyǵystary josparǵa qatysty 99,6% oryndaldy», - dep atap ótti Premer-Ministr.
Onyń aitýynsha, respýblikalyq biýdjet shyǵystary 99,9%, al jergilikti biýdjetter – 99,6% oryndaldy.
«Pandemiia jaǵdaiynda naqty sektor ekonomikanyń turaqtylyq faktoryna ainalyp, óziniń básekege qabiletti ekenin kórsetti. Óńdeýshi sektordyń 5,6% óskeniniń arqasynda ónerkásiptiń oń ósý qarqyny 1,5% deńgeiinde qamtamasyz etilýde. Farmatsevtikalyq ónim 31,1%, mashina jasaý 22,1%, onyń ishinde avtomobil jasaý 32%, vagondar men lokomotivter 37,5%, qurylys materialdary 19,5%, kiim 19,5% jáne jihaz óndirisinde 19% deńgeiinde serpindi ósý qamtamasyz etildi», - deidi A. Mamin.
Sonymen birge, OPEK pliýs kelisimi boiynsha mindettemelerdi oryndaý aiasynda munai óndirýdiń 5,3% qysqarýyna bailanysty taý-ken óndirý ónerkásibindegi serpinniń 3% shektelýi baiqalady.
«2004 jyldan beri alǵashqy ret ekonomika qurylymyndaǵy óńdeýshi ónerkásip úlesi taý-ken óndirý ónerkásibinen asyp tústi. Qurylys sektorynda joǵary kórsetkishterge qol jetkizdik. Jartyjyldyq qorytyndysy boiynsha ósý 11,9% boldy. 6,6 mln sharshy metr turǵyn úi paidalanýǵa berildi, bul byltyrǵy jyldyń osyndai kezeńimen salystyrǵanda 8,3% joǵary. Aýyl sharýashylyǵyndaǵy 3,2% deńgeiindegi ósim, mal sharýashylyǵyndaǵy óndiris kólemin 3,4% ulǵaitý esebinen bolyp otyr», - dedi Asqar Mamin.
Aita keteiik, Memleket basshysy Qasym-Jomart Toqaevtyń tóraǵalymen Úkimettiń keńeitilgen otyrysy bastaldy. Beinebailanys rejiminde ótip jatqan otyrysta Ministrler kabinetiniń barlyq músheleri, oblystardyń, respýblikalyq mańyzy bar Nur-Sultan, Almaty, Shymkent qalalarynyń ákimderi qatysýda. Jiyn barysynda elimizdiń biylǵy jartyjyldyqtaǵy áleýmettik-ekonomikalyq damýy qorytyndylanbaq. Sondai-aq Qazaqstan Prezidenti pandemiiadan keiingi kezeńdegi ekonomikany damytýdyń mindetterin belgilep beredi dep kútilýde.
