Pandemiia Nur-Sultan qalasynda Táýelsizdiktiń 30 jyldyǵyna arnap ótkiziletin sharalardyń formatyn ózgertip, aýqymyn taryltýda, dep habarlaidy QazAqparat.
Qalalyq ishki saiasat basqarmasynyń basshysy Dáýren Babamuratovtyń aitýynsha, biyl Táýelsizdik mereitoiy aiasynda elordada 800-den astam shara ótkizý josparlanǵan eken. Búginde sonyń jartysyna jýyǵy iske asqanymen, o bastaǵy aýqymy men formatyna túzetýler engen. Onyń bárine pandemiiamen bailanysty shekteýler sebepker.
«Pandemiia Táýelsizdik toiyna sózsiz áser etti. Ókinishke qarai, qatań sanitarlyq talaptar boiynsha jáne elordanyń «qyzyl» aimaqta bolýyna bailanysty jabyq ǵimarattyń ishinde ótýi josparlanǵan, asa mańyzdy kóptegen is-sharany onlain formatta ótkizýge májbúr bolyp otyrmyz. Buǵan deiin de birshama sharanyń kólemin azaityp, qatysýshylar sanyn shektegen bolatynbyz. Ahýal osylai jalǵasatyn bolsa, kóptegen josparǵa túzetýler engizetinimiz sózsiz», - dedi ákimdik ókili.
Onyń aitýynsha, Táýelsizdiktiń 30 jyldyǵyna arnalǵan «Qaiyrymdy ister marafony» aiasynda elordalyqtarǵa 10 myńnan astam azyq-túlik sebeti taratylǵan.
«Táýelsizdiktiń 30 jyldyǵy aiasynda Nur-Sultan qalasynda 300-den astam shara ótkizildi. Bul sharalar 66 myńnan astam adamdy qamtyp, ataýly kómek pen qoldaý kórsetildi. «Qaiyrymdy ister marafony» uranymen ótken sharalar aiasynda ákimdik qyzmetkerleri men eriktiler, Qazaqstan halqy Assambleiasynyń qalalyq bólimshesiniń ókilderi men biznesmender jarty jyldyń ishinde 10 myńnan astam azyq-túlik sebetin taratty», - dedi ákimdik ókili.
