«Astana Venue Management» JShS-nyń bas direktory Málik Hasenov elordadaǵy mádeni nysandardyń 2020 jylǵy shyǵystaryna qatysty naqty derektermen bólisti, dep habarlaidy QazAqparat.
«Eger ár nysanǵa qatysty naqty aitar bolsaq, Táýelsizdik saraiynyń aýmaǵy 38 myń sharshy metrdi quraidy. Jóndeý jumystary, ǵimarat tamasha. 2020 jylǵy kirisi 29 mln, al shyǵysy 467 mln teńgeni qurady. Kommertsiialyq ósim turǵysynan alyp qaraityn bolsaq, jalǵa 8 myń sharshy metrdi berýge bolar edi. Qazirgi ýaqytta onyń 300 sharshy metri jalǵa berilgenimen 100 sharshy metri qaitarymsyz negizde usynylyp otyr», - dedi ol Nur-Sultan qalalyq máslihatynyń áleýmettik-mádeni damý máseleleri jónindegi komissiiasynyń otyrysynda.
Onyń dereginshe, ótken jyly elordadaǵy Beibitshilik pen kelisim saraiy da mol shyǵynǵa batqan.
«Beibitshilik pen kelisim saraiy nemese Piramidany alar bolsaq, 2020 jylǵy kirisi 4 mln teńgeni ǵana qurady. Al shyǵysy – 465 mln teńge. Kommertsiialyq alańy – 5,5 myń sharshy metr. Onyń 4,6 myń sharshy metri jalǵa berilgenimen 4 550 sharshy metri tegin paidalanylyp otyr. Nysandardyń ishinde «Astana-Báiterek» pandemiia saldarynan úlken ziian shekti. Óitkeni, «Báiterek» 2007 jyldan beri ózin-ózi qarjylandyryp kelgen bolatyn. Al 2020 jyldyń qorytyndysynda pandemiia rejimi saldarynan nysan jumysy toqtap qaldy», - dedi spiker.
JShS basshysynyń aitýynsha, atalǵan úsh nysannyń qyzmetine qatysty senimdi basqarýǵa berilgen mádeni oshaqtardy damytý strategiiasy ázirlengen.
«Bul tujyrymdama qala ákimine tanystyrylyp, qoldaý tapty. Sonymen birge el basshylyǵyna da tanystyryldy. Bul rette birqatar saiasi sheshim qajet. Sondyqtan biz tolyq qoldaýǵa ie boldyq», - dedi M.Hasenov.
