Pandemiia kezinde senimdi aqparat kózin izdegen aýditoriia telearnalarǵa oraldy. Bul týraly «Astana Media Week 2020» barysynda «QAZAQSTAN» RTRK» AQ Basqarma tóraiymy Lázzat Tanysbai aitty, dep habarlaidy QazAqparat.
«Pandemiia kezindegi telearnalar taqyrybyna toqtalatyn bolsaq, bizde de barlyq saladaǵydai ózgerister óte kóp. «Qazaqstan» korporatsiiasynyń quramynda birneshe respýblikalyq telearna, radiostantsiialar jáne aimaqtyq telearnalar bar. Barlyǵyna toqtalý múmkin emes. Dese de, karantin engizgen negizgi ózgerister jóninde aityp ótsem. Shyny kerek, menedjer retinde dál osy sátte eki úlken mindet-missiianyń arasynda qaldyq. Birinshisi jáne eń bastysy - qyzmetkerlerimizdiń qaýipsizdigin saqtaý. Bilesizder, ujym óte úlken, sondyqtan da aldymen múmkin bolǵan redaktsiialardyń jumysyn qashyqtyqqa aýystyryp, keibir bólim qyzmetkerlerdi aýysymdarǵa bóldik. Jýrnalist, rejisser, redaktorlarymyz habarlaryn tutastai bolmasa da, onlainda jasaýǵa daǵdylandy», - dedi Lázzat Tanysbai.
Degenmen ol munyń barlyq qyzmetterge qatysty emestigin basa aitty.
«Sebebi – aldymyzda kórermendi naqty, tekserilgen aqparatpen qamtamasyz etý jáne teleefirdi sapaly kontentpen toltyrý mindeti turdy. Kerisinshe, karantin kezinde dáleldi, shynaiy, shuǵyl aqparatqa degen suranys kúsheidi. Sondyqtan da elde karantin bolǵan kezde televiziia mindeti men ondaǵy mamandardyń qyzmeti eselep artty. Mysaly «Qazaqstan» arnasy bir ǵana kovid taqyrybynda 200 rolik jasap efirge berdi. Sol kezde qolǵa alynǵan kúnsaiynǵy tikelei efirdegi «Teledáriger» jobasyna bir habardyń ishinde eki myńǵa deiin suraq kelip túsip otyrǵan kúnder boldy. Dál karantin kúnderi jańalyqtar shyǵarylymdary buryn-sońdy bolmaǵan qaralymdardy kórsetti», - dedi ol.
Korporatsiia tóraiymynyń aitýynsha, Qazaqstandaǵy jalpy televiziia kórý 22 paiyzǵa ósken. Munyń ishinde korporatsiia arnalarynyń da úlesi salmaqty.
«Bir sózben aitsaq, pandemiia kezinde senimdi aqparat kózin izdegen aýditoriia telearnalarǵa oraldy», - dedi Lázzat Tanysbai.
